ფეხბურთის ფედერაციასთან აქციაზე დაკავებულების სასამართლო სხდომა 30 ნოემბრამდე გადაიდო.

პროცესზე ორივე მხარემ დრო ითხოვა, რათა მათ გუშინდელი აქციის ამსახველი ჩანაწერები წარმოედგინათ. სულ სხდომაზე ადმინისტრაციული წესით დაკავებული 7 პირი იმყოფებოდა. შვიდივე მათგანი ქართული მარშის წევრია.

ისინი ადმინისტრაციული კოდექსის 166-ე და 173-ე მუხლით დააკავეს, რაც წვრილმან ხულიგნობას და პოლიციელისადმი წინააღმდეგობის გაწევას გულისხმობს.

ერთ-ერთი დაკავებული გიორგი ჭელიძე პროცესზე არ იმყოფებოდა. ადვოკატის ინფორმაციით, მას ფიზიკური დაზიანებები აღენიშნება და ამჟამად საავადმყოფოში იმყოფება.

საქალაქო სასამართლოში ასევე იყო ქართული მარშის ერთ-ერთი დამფუძნებელი ლადო სადღობელაშვილი, რომელიც გუშინ ასევე დააკავეს, თუმცა ხელწერილის საფუძველზე გაათავისუფლეს.

შეგახსენებთ, რომ ქართული მარშის წევრებმა აქცია გუშინ ფეხბურთის ფედერაციასთან გამართეს, სადაც ფედერაციის პრეზიდენტის, ლევან კობიაშვილის გადადგომას ითხოვდნენ.