ირანის პრეზიდენტის ჰასან როუჰანის განცხადებით, ირანი და რუსეთი რეგიონში მშვიდობისა და სტაბილურობის უზრუნველყოფაში მნიშვნელოვან როლს ასრულებენ.
რუსეთის პრეზიდენტი ვლადიმერ პუტინი ცოტა ხნის წინ თეირანში ჩავიდა, სადაც მას აზერბაიჯანისა და ირანის ლიდერებთან სამმხრივი მოლაპარაკებები აქვს დაგეგმილი.
თეირანის აეროპორტიდან ვლადიმერ პუტინი საადაბადის სასახლეში გაემგზავრა, სადაც მას როუჰანი დახვდა. რუსეთის პრეზიდენტმა კოლეგას მადლობა გადაუხადა ორმხრივ და სამმხრივ ფორმატში მოლაპარაკებების გამართვის შესაძლებლობისთვის.
ირანის, რუსეთისა და აზერბაიჯანის ლიდერების ბოლო შეხვედრა ბაქოში 2016 წლის აგვისტოში გაიმართა.
ამასთან, როგორც სააგენტო IRNA იტყობინება, თეირანში უკვე გაიმართა რუსეთისა და ირანის შეიარაღებული ძალების გენშტაბის უფროსების შეხვედრა, რომელზეც მათ თეირანსა და მოსკოვს შორის სამხედრო სფეროში თანამშრომლობა განიხილეს.
ვალერი გერასიმოვმა და მუჰამედ ბაკერიმ ასევე სირიის კონფლიქტსა და ტერორიზმის წინააღმდეგ ბრძოლის საკითხზე იმსჯელეს.