ქართულ-ამერიკული უნივერსიტეტის ხელმძღვანელი და საქართველოში აშშ-ის სავაჭრო პალატის პრეზიდენტი მაიკლ ქაუგილის წერილს დეპუტატები და მთავრობის წევრები აფასებენ.
აშშ-ს სჭირდება თავისუფალი ვაჭრობის შეთანხმება საქართველოსთან, - ამის შესახებ ამერიკულ გამოცემა ჰილში გამოქვეყნებულ საავტორო პუბლიკაციაში მაიკლ ქაუგილი წერს. სტატიაში ნათქვამია, რომ საქართველო რეგიონში სამაგალითოდ წარმატებული სახელმწიფოა, სადაც აშშ-ის ინტერესები დიდი და მზარდია. მისივე თქმით, აშშ-ის კონგრესისა და მთავრობის მხარდაჭერით განხორციელებულმა პროგრამებმა ხელი შეუწყო საქართველოში თავისუფალ ბაზარზე ორიენტირებული ეკონომიკური რეფორმების გატარებას და დემოკრატიული გარემოს გაუმჯობესებას.
სტატიის ავტორი აცხადებს, რომ წამყვანი ამერიკული კომპანიები საქართველოში ინვესტიციებს წლების მანძილზე აბანდებენ, თუმცა საქართველოს ცნობადობის გაზრდისთვის საჭიროა აშშ-სა და საქართველოს შორის თავისუფალი ვაჭრობის შესახებ შეთანხმება სასწრაფოდ გაფორმდეს.