ენის სახელმწიფო დეპარტამენტის ახალი ხელმძღვანელს აფხაზური ენის დაცვისა და განვითარების სახელმწიფო პროგრამის შემუშავებაზეც მოუწევს მუშაობა. ამის შესახებ პირველ არხს ენის სახელმწიფო დეპარტამენტის ახალმა ხელმძღვანელმა გიორგი ალიბეგაშვილმა განუცხადა. მისი თქმით, ამ მიმართულებით მუშაობის გამოცდილება აქვს.

„მინდა, სიამაყით აღვნიშნო, რომ ჩემი ინიციატივითა და ბატონი დავით ნარმანიას მხარდაჭერით აღვადგინეთ „ცისკარი“, 1852 წლიდან გამოსული, უკვე კულტურულ მემკვიდრეობად ქცეული ჟურნალი, რომელშიც ქართული თარგმანით ვბეჭდავდით აფხაზი ავტორის აფხაზურ ენაზე დაწერილ ტექსტს, ისევე როგორც ოსურ ენაზე დაწერილი ტექსტები ითარგმნებოდა ქართულად და პირიქით. ეს ჟურნალები იგზავნებოდა სოხუმსა და ცხინვალში და აღწევდა დანიშნულების ადგილამდე. საკრებულოს უკვე გადადგმული გვაქვს ნაბიჯები ამ მიმართულებით და ჩვენ სამუშაოს კიდევ უფრო გავაფართოვებთ“- განაცხადა გიორგი ალიბეგაშვილმა.

მისივე თქმით, ენის სახელმწიფო დეპარტამენტი 90-იან წლებამდე ფუნქციონირებდა, შემდეგ კი გაუქმდა. გიორგი ალიბეგაშვილი მიესალმება პრემიერ-მინისტრის გადაწყვეტილებას, რომ ერისთვის ძალიან მნიშვნელოვანი და ეროვნული სამსახური წინა პლანზე იქნა წამოწეული.

„როგორც პრემიერის დავალებაშია მოცემული, უნდა შემუშავდეს დებულება, განისაზღვროს ყველა მიმართულება, ყველა ხაზი და ბუნებრივია, რომ ქალაქის წინაშე ვალდებული ვართ, შეძლებისდაგვარად დავიცვათ ქართული ენის სიწმინდე, აბრა იქნება ეს, თუ წარწერა“, - განაცხადა გიორგი ალიბეგაშვილმა.

რაც შეეხება კითხვას, გააგრძელებს თუ თბილისის საკრებულოში საქმიანობას ენის სახელმწიფო დეპარტამენტის ხელმძღვანელად დანიშვნის შემდეგ, საკრებულოს მოქმედი თავმჯდომარე გიორგი ალიბეგაშვილი პასუხობს, რომ მომავალი მოწვევის საკრებულოში საქმიანობას თანამდებობის გარეშე გააგრძელებს.

„ჯერ ეს მოცემულობაა, რომ საკრებულოს რიგითი წევრი ვიქნები. შემდეგში საქმე როგორც მოითხოვს, ისე განვსაზღვრავ ყველაფერს, რა დატვირთვა და დროის როგორი შესაძლებლობა მექნება“, - აღნიშნა ალიბეგაშვილმა.

საკრებულოს მოქმედი თავმჯდომარე, გიორგი ალიბეგაშვილი პრემიერ-მინისტრმა, ენის სახელმწიფო დეპარტამენტის თავმჯდომარედ დანიშნა. გიორგი ალიბეგაშვილი ახალი მოწვევის საკრებულოში პროპორციული სიის მე-10 ნომერია.

საკრებულოს წევრობასთან მისი ახალი თანამდებობა შეუთავსებელი არ არის, მაგრამ ის კომისიისა და ფრაქციის თავმჯდომარის პოსტს ვერ დაიკავებს.