მსოფლიო ყურადღების ცენტრში ახლა ესპანეთია. ქვეყნის სენატმა კატალონიის სამთავრობო ინსტიტუტებზე ცენტრალური კონტროლის დაწესებას მხარი დაუჭირა.
საკანონმდებლო ორგანომ გადაწყვეტილება მას შემდეგ მიიღო, რაც კატალონიის პარლამენტმა ესპანეთისგან გამოყოფა გამოაცხადა.
ესპანეთის სენატის მიერ კონსტიტუციის 155-ე მუხლის ამოქმედება ნიშნავს, რომ ოფიციალურ მადრიდს შეუძლია კატალონიის პარლამენტის დაშლა, კატალონიის პრეზიდენტის გადაყენება და რეგიონის საპოლიციო ძალებზე კონტროლის დაწესება.
1975 წელს ფრანსისკო ფრანკოს დიქტატორული რეჟიმის დასრულების შემდეგ ეს პირველი შემთხევაა, როდესაც ცენტრალური ხელისუფლება რეგიონის საქმეებზე პირდაპირ კონტროლს აწესებს.
ესპანეთის პრემიერ-მინისტრმა, მარიანო რახოიმ სენატში სიტყვით გამოსვლისას თქვა, რომ კატალონიამ ესპანეთის კანონმდებლობა დაარღვია.