აღმოსავლეთ პარტნიორობის სამიტამდე ერთი თვით ადრე, ევროკავშირის უმაღლესი წარმომადგენელი საგარეო პოლიტიკისა და უსაფრთხოების საკითხებში ფედერიკა მოგერინი აღმოსავლეთ პარტნიორობის სამოქალაქო საზოგადოების ფორუმისთვის ვიდეომიმართვას ავრცელებს.

მოგერინი ამბობს, რომ მომავალი სამიტის ყურადღების ცენტრში იქნება ყველა ის საკითხი, რომელიც ეხება, უპირველეს ყოვლისა, დემოკრატიას, თანამშრომლობას ეკონომიკასა და ვაჭრობაში, ადამიანის უფლებებს, კანონირების დაცვას.

„აღმოსავლეთ პარტნიორობა არ არის გეოპოლიტიკის შესახებ ან გავლენების სფერო. ის არის იმისთვის, რომ შევქმნათ რეალურად პოზიტიური განსხვავება ჩვენი მოქალაქეების ცხოვრებაში. ის არის თანამშრომლობისთვის და არა მის წინააღმდეგ. ის არის თანამშრომლობა ეკონომიკისა და ვაჭრობისთვის, მაგრამ უპირველესად ის არის დემოკრატიის, ადამიანის უფლებებისა და კანონიერებისთვის. აქ არის სივრცე სამოქალაქო საზოგადოებისთვის.

ყველა ეს საკითხი იქნება მომავალი თვის სამიტის ყურადღების ცენტრში. 2020 წლისთვის 20 კონკრეტული წინადადება შესრულდება. ეს ნამდვილად ამბიციური პროგრამაა და ჩვენ დაგვჭირდება თქვენი დახმარება, თქვენი მუშაობა და ჩვენი ერთობლივი ძალისხმევა, რომ ეს რეალობად ვაქციოთ.

ჩვენ ვართ პარტნიორები და გვჭირდება ერთმანეთი, რომ ვუპასუხოთ ერთობლივ გამოწვევებს. ასე რომ, ჩვენ გვჭირდებით თქვენ, რათ გავაძლიეროთ აღმოსავლეთ პარტნიორობა“, - აცხადებს ფედერიკა მოგერინი ვიდეომიმართვაში.

აღმოსავლეთ პარტნიორობის სამიტი ორ წელიწადში ერთხელ იმართება და აჯამებს აღმოსავლეთ პარტნიორობის პოლიტიკის ფარგლებში წევრი ქვეყნების მიერ მიღწეულ პროგრესს და განსაზღვრავს თანამშრომლობის ახალ მიმართულებებს. წლევანდელი სამიტი 24 ნოემბერს ბრიუსელში გაიმართება.

საქართველო წლებია დამსახურებულად მიიჩნევა აღმოსავლეთ პარტნიორობის ლიდერად დემოკრატიული და ეკონომიკური რეფორმების განხორციელების თვალსაზრისით.