ოპოზიციური პარტიების „ლიდერთა საბჭო“ დიპლომატიურ კორპუსს, ადგილობრივ და საერთაშორისო ორგანიზაციებს წინასაარჩევნო პერიოდის შეფასების ანგარიშს აცნობს.
ოპოზიციური პარტიები შეშფოთებას გამოთქვამენ, ადგილობრივი თვითმმართველობის არჩევნების წინ შექმნილი არასამართლიანი და დისკრიმინაციული წინასაარჩევნო გარემოს გამო.
როგორც საბჭოს წევრმა მამუკა კაციტაძემ აღნიშნა, მედიაგარემო მმართველი პარტიის მიერ არის მონოპოლიზებული. მისი თქმით, ამას გარდა, მმართველ პარტიას დაფინანსების მიმართულებითაც უპირატესობა აქვს.
„აშკარაა ადმინისტრაციული რესურსის გამოყენება, დაწყებული საბავშვო ბაღებიდან და დამთავრებული სხვადასხვა სახელმწიფო სტრუქტურით, არის კანდიდატებზე ზეწოლის მთელი რიგი მომენტები“, - განაცხადა კაციტაძემ.
მისი თქმით, ხვალ დილიდან იფუნქციონირებს ლიდერთა საბჭოს საინფორმაციო ცენტრი, რომელიც არჩევნების მიმდინარეობასთან დაკავშირებით არასამთავრობოებსა და საზოგადოებას მიაწვდის ინფორმაციას, არჩევნების შემდგეგ კი გამოაქვეყნებენ შემაჯამებელ დოკუმენტს, სადაც დააფიქსირებენ ერთობლივ პოზიციას საარჩევნო გარემოსთან და ნაკლოვანებებთან დაკავშირებით.
ნინო ბურჯანაძე კი ეჭვობს, რომ საქართველოში აშშ-ის ელჩმა იან კელიმ სპეციალურად იჩქარა საარჩევნო გარემოს შეფასება. მისი შეფასებით,ყველა ოპოზიციური პარტია საუბრობს იმაზე, რომ წინასაარჩევნო გარემო არ არის თანაბარი და, ამის ფონზე, იან კელი აკეთებს განცხადებას, რომ წინასაარჩევნო გარემო არის პოზიტიური. ბურჯანაძის შეფასებით, ეს უცნაურია.