შინაგან საქმეთა სამინისტროს ობიექტების დაცვის დეპარტამენტის 127 წვევამდელმა ბათუმსა და გორში სამხედრო ფიცი დადო.
ფიცის დადების ცერემონიალს შს მინისტრის მოადგილე, მერაბ მალანია, ობიექტების დაცვის დეპარტამენტის წარმომადგენლები და ახალწვეულთა ოჯახის წევრები დაესწრნენ.
ახალწვეულებმა წუთიერი დუმილით პატივი მიაგეს სამსახურებრივი მოვალეობის შესრულების დროს გმირულად დაღუპული შსს-ს თანამშრომლების ხსოვნას. შესრულდა საქართველოს სახელმწიფო ჰიმნი. ფიცის დადების ცერემონიალის პარალელურად, ობიექტების დაცვის დეპარტამენტის ხელმძღვანელებმა წარჩინებულ ვადიან სამხედრო მოსამსახურეებს სერთიფიკატები გადასცეს.
ახალწვეულები ერთწლიან სავალდებულო სამხედრო სამსახურს შსს-ს ობიექტების დაცვის დეპარტამენტში გაივლიან. ისინი სამხედრო საქმეს შეისწავლიან და პროფესიონალი ჯარისკაცისთვის აუცილებელ უნარ-ჩვევებს შეიძენენ, უზრუნველყოფილი იქნებიან უფასო სამედიცინო მომსახურებით, უფასო კვებით და ისარგებლებენ მოკლევადიანი შვებულებით, ასევე, მონაწილეობას მიიღებენ ადგილობრივ სპორტულ ღონისძიებებში.