მოლდოვას საკონსტიტუციო სასამართლომ პრეზიდენტს მთავრობის მიერ სხვადასხვა თანამდებობაზე წარდგენილი კანდიდატების ბლოკირების უფლება ჩამოართვა.
სასამართლომ დაასკვნა, რომ იგორ დოდონმა კონსტიტუცია და პრეზიდენტის ფიციც დაარღვია.
ამ გადაწყვეტილების მიზეზი თავდაცვის მინისტრად ეუჯენ სტურზის დანიშვნაზე პრეზიდენტის მიერ დადებული ვეტო გახდა.
საკონსტიტუციო სასამართლოს ვერდიქტის შედეგად, თანამდებობის პირთა დანიშვნას ამიერიდან პრეზიდენტის თანხმობა და ხელმოწერა აღარ დასჭირდება. ამ ფუნქციას პარლამენტის თავმჯდომარე შეასრულებს.
მოლდოვას კონსტიტუციის მიხედვით, პრეზიდენტს მმართველი პარტიის მიერ მინისტრად წარდგენილი კანდიდატის ბლოკირება ერთხელ შეუძლია. დოდონმა კი ახალი თავდაცვის მინისტრის დანიშვნაზე უარი ორჯერ თქვა. ამიტომ, სასამართლომ მიიჩნია რომ პრეზიდენტი მოვალეობების შესრულებას თავს არიდებს.
"პრეზიდენტის უარი შეასრულოს კონსტიტუციით განსაზღვრული მოვალეობა, ნიშნავს რომ მას მანდატის შესრულება არ შეუძლია. ასეთ ვითარებაში, გამართლებულია სახელმწიფოს მეთაურის მოვალეობის დროებით შემსრულებლად პრემიერ მინისტრისა ან პარლამენტის თავმჯდომარის დანიშვნა" - განმარტეს საკონსტიტუციო სასამართლოში. თუმცა იქვე დაამატეს, რომ პრეზიდენტის მხრიდან თითოეულ კონკრეტულ ქმედებას სასამართლო განცალკევებით განიხილავს.
თავად პრეზიდენტმა დოდონმა მომხდარი მთავრობის მხრიდან ხელისუფლების უზურპაციად შეაფასა, ხოლო ქვეყანაში შექმნილ სიტუაციას ანარქია უწოდა.
მისივე თქმით, ის ბრძოლას გააგრძელებს, რადგან მთავრობა მის იმპიჩმენტს ვერ გაბედავს.