თბილისში დაკავებული თურქი პედაგოგის სარჩელის განხილვა დაიწყო. საქალაქო სასამართლოში გამართულ დღევანდელ სხდომაზე ადვოკატებმა დამატებითი მტკიცებულებები წარადგინეს, რითიც, მათივე მტკიცებით, დასტურდება, რომ ოფიციალური ანკარის მოთხოვნის დაკმაყოფილების და თურქეთში ექსტრადირების შემთხვევაში მუსტაფა ემრე ჩაბუქს წამება ემუქრება.
სარჩელში დაცვის მხარე ითხოვს, რომ ბათილად გამოცხადდეს დევნილთა და განსახლების სამინისტროს ის გადაწყვეტილება, რომლის მიხედვით ჩაბუქს და მის ოჯახს ლტოლვილის სტატუსის მინიჭებაზე უარი უთხრეს.
გახმაურებულ საქმეს თან დაერთო იმ ოთხი არასამთავრობო ორგანიზაციის დასკვნა, რომლებიც სასამართლოს მეგობრის სტატუსით მიმართავენ.
შეგახსენებთ, რომ 24 მაისს თურქეთის მოთხოვნით დაკავებულ ჩაბუქს თურქული მხარე ტერორისტულ ორგანიზაციასთან კავშირში ადანაშაულებს. ამ დროისთვის ის საექსტრადიციო პატიმრობაშია.