ამერიკის პრეზიდენტი დონალდ ტრამპი რესპუბლიკელ სენატორს ბობ კორკერს პასუხობს. სენატორის თქმით, შეერთებული შტატების ახალი ადმინისტრაციის პოლიტიკა ამერიკას მესამე მსოფლიო ომის გზაზე დააყენებს. დონალდ ტრამპი კი აცხადებს, რომ ამერიკა ახლა სწორ გზას ადგას.
„ბოლო 25 წლის განმავლობაში შეერთებული შტატები იყო ძალიან დიდი პრობლემების გზაზე, ისეთი პრობლემების, რომელიც მსოფლიოს ჯერ არ უნახავს. დამიჯერეთ, ახლა ჩვენ სწორ გზას ვადგავართ“ - განაცხადა დონალდ ტრამპმა.
ამ განცხადებამდე, ტრამპმა ბობ კორკერი მიკრობლოგ „ტვიტერის“ საშუალებით გააკრიტიკა, სადაც დაწერა, რომ კონგრესმენს იმის გამბედაობაც კი არ ეყო, რომ 2018 წლის სენატში ხელახლა ასარჩევად საკუთარი კანდიდატურა დაეყენებინა. გარდა ამისა, ტრამპის თქმით, სენატორი პასუხისმგებელია ირანთან, როგორც ტრამპი უწოდებს, საშინელი ბირთვული შეთანხმების გაფორმებაზე. ტრამპის ამ განცხადებებს კორკერმაც მიკრობლოგ „ტვიტერის“ საშუალებით უპასუხა, სადაც დაწერა, რომ თეთრი სახლი საბავშვო ბაღად იქცა.