ჩეხეთის პრეზიდენტის მილოშ ზემანის სკანდალურ განცხადებას ქვეყნის პრემიერ-მინისტრი გამოეხმაურა.
„ზემანის გამოსვლა ევროსაბჭოში მკვეთრად განსხვავდება ჩვენი პოზიციისგან და პრეზიდენტს ჩეხეთის მთავრობისგან მანდატი არ ჰქონდა“ - განაცხადა ქვეყნის პრემიერმა ვასლავ კლაუსმა.
მთავრობის მეთაური ამბობს, რომ ქვეყანა საერთაშორისო სამართლის დაცვის მომხრეა. პრემიერის თქმით, რუსეთის წინააღმდეგ დაწესებული სანქციები დაკავშირებულია მინსკის შეთანხმების შესრულებასთან, ამ შეთანხმების უგულებელყოფა კი, დაუშვებელია.
ჩეხეთის პრეზიდენტი დღეს ევროსაბჭოს საპარლამენტო ასამბლეაზე წინადადებით გამოვიდა, რომ უკრაინას რუსეთის მიერ ანექსირებული ყირიმის დაკარგვის სანაცვლოდ ან ფულადი კომპენსაცია შესთავაზონ ან ენერგომატარებლების მიწოდება.
„ჩემი აზრით, უნდა დაწესდეს უკრაინის მისამართით კომპენსაცია ან ფინანსური ფორმით, ან ენერგომატარებლების მიწოდების გზით“ - განაცხადა ჩეხეთის პრეზიდენტმა. ზემანმა აღნიშნა, რომ მისთვის ყირიმის ანექსია უკანონო ქმედებაა, თუმცა დაამატა, რომ ეს საკითხი უკვე გადაწყვეტილია. „ყირიმი - ეჭვი არავის ეპარება, რომ ეს ანექსიაა, ეს დასრულებული საქმეა“ - განცხადა ჩეხეთის პრეზიდენტმა.
ზემანმა ყირიმის ანექსიისა და აღმოსავლეთ უკრაინაში მიმდინარე კონფლიქტის გამო ევროკავშირის მიერ რუსეთის წინააღმდეგ დაწესებული სანქციებიც გააკრიტიკა. ამასთან ზემანმა ხაზი გაუსვა, რომ ეს მისი პირადი მოსაზრებაა.