ქართული მხარე შვეიცარულ მხარესთან არის პირნათელი, ჩვენ ვალდებულებები შესრულებული გვაქვს და შემხვედრი ნაბიჯების გადადგმაა საჭირო სწორედ რუსეთის ფედერაციის მხრიდან,- ასეთი კომენტარი გააკეთა გრიგორი კარასინის განცხადებაზე შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა, ქეთევან ციხელაშვილმა.
"ჩემთვის გაუგებარია ამ შინაარსის განცხადების კონტექსტი. ცალსახად ვადასტურებ, რომ ქართულ მხარეს ვალდებულებები აქვს შესრულებული და პროცესის დაჩქარებისთვის საჭიროა რუსული მხარის შემხვედრი ნაბიჯები, გაფორმებული მემორანდუმის შეთანხმების ფარგლებში და იმ პირობების დაცვით, რომელიც მხარეებს შორის 2011 წელს გაფორმდა",-აღნიშნა სახელმწიფო მინისტრმა.
მისივე თქმით, თუ საუბარია, რატომ არ სრულდება შეთანხმება, მაშინ პასუხი არის ცალსახა - ქართულ მხარეს შესრულებული აქვს ყველა ვალდებულება, რომელიც უნდა შეესრულებინა.
რუსეთის საგარეო საქმეთა მინისტრის მოადგილე გრიგორი კარასინი "საქართველოს მოუწოდებს, შეასრულოს 2011 წლის შეთანხმება ვაჭრობის მონიტორინგის შესახებ",- ამის შესახებ კარასინმა რუსულ სააგენტო „რია ნოვოსტისთვის“ მიცემულ ინტერვიუში განაცხადა.