კატალონიის მთავრობის მეთაური, სასამართლოს აკრძალვის მიუხედავად, ავტონომიური რეგიონის დამოუკიდებლობის გამოცხადებას გეგმავს.
კარლეს პუიჩდემონის თქმით, მადრიდი შუამავლობის შესახებ წინადადებაზე არ რეაგირებს. კატალონიის პარლამენტმა რეგიონის ესპანეთისგან გამოყოფის შესახებ შესაძლოა, სამშაბათს განაცხადოს.
10 ოქტომბრისთვის გადადო სიტყვით გამოსვლა კარლეს პუიჩდემონმაც. პარალელურად კი ბარსელონაში გამოყოფის წინააღმდეგ, მრავალათასიანი აქცია გაიმართა.
დემონსტრაციაზე მისული 350 ათასამდე მოქალაქე ესპანეთისგან დამოუკიდებლობის გამოცხადებას ეწინააღმდეგება. აქცია “კატალონიის სამოქალაქო საზოგადოების” ორგანიზებით წარიმართა, რომელთა განცხადებითაც, დემონსტრაციას მილიონამდე ადამიანი ესწრებოდა.
აქციაზე იმყოფებოდა ნობელის პრემიის ლაურეატი ლიტერატურის დარგში, პერუელი მწერალი მარიო ვარგას ლიოსაც. ქვეყნის პრემიერ-მინისტრი კი კატალონიის მთავრობის დათხოვნით იმუქრება. მარიანო რახოიმ დათმობაზე წასვლა კატეგორიულად გამორიცხა.