ზეწოლა- მუქარა, ძალადობრივი ქმედებები, წინასაარჩევნო კამპანიის ხელის შეშლა, აგიტაციაში უკანონოდ მონაწილეობა და ინტერესთა კონფლიქტი - ასეთია, სავარაუდოდ, დარღვევების ნაწილი, რომელიც სამართლიანი არჩევნების მიერ წინასაარჩვნო გარემოს მონიტორინგის მეორე შუალედურ ანგარიშში მოხვდა.
გამოკითხვის ავტორები აცხადებენ, რომ ბოლო პერიოდში ტენდენციის სახით გამოიკვეთა საოლქო საარჩევნო კომისიებში ინტერესთა კონფლიქტის ფაქტები, საუბარია ისეთ შემთხვევებზე, როდესაც საოლქო კომისიის წევრის ოჯახის წევრები არჩევნებზე წარმოდგენილი არიან, როგორც პოლიტიკური პარტიების კანდიდატები.
გარდა ამისა, ანგარიშში საუბარია დღეს დაგეგმილ საქველმოქმედო საფეხბურთო მატჩზეც. ამ კონკრეტულ შემთხვევაში, „სამართლიანი არჩევნები“ ადმინისტრაციული რესურსის, აგიტაციის წესების დარღვევისა და უკანონო შემოწირულობების გამოყენების რისკებს ხედავს.
ანგარიშის ავტორები რეკომენდაციებით მიმართავენ როგორც საარჩევნო ადმინისტრაციას, ასევე პოლიტიკურ პარტიებსა და თვითმმართველობის ორგანოებს.
ანგარიში 5 სექტემბრიდან 25 სექტემბრამდე პერიოდს მოიცავს. „სამართლიანი არჩევნების“ მიერ წარმოდგენილ ანგარიშში მოხვედრილ სავარაუდო დარღვევის ფაქტებს უკვე გამოეხმაურნენ მმართველი გუნდის წევრები.