ეთნიკური უმცირესობების საკითხებზე მომუშავე ორგანიზაციების ინიციატივით, ეთნიკური უმცირესობების წარმომადგენლები თბილისის მერობის კანდიდატებს შეხვდებიან. ამის შესახებ ორგანიზატორებმა პრესკონფერენციაზე განაცხადეს.

შეხვედრის სურვილს 19 დიასპორა გამოთქვამს. როგორც ორგანიზატორები აცხადებენ, ისინი დედაქალაქის ელექტორატის დაახლოებით 20 %-ს წარმოადგენენ. ამჟამად ორგანიზატორები მერობის კანდიდატებთან მოლაპარაკებებს მართავენ. თანხმობის შემთხვევაში შეირჩევა მერობის კანდიდატის სასურველი დრო და ლოკაცია.

ეთნიკური უმცირესობების საკითხებზე მომუშავე ორგანიზაციების წარმომადგენლის თქმით, შეხვედრის სურვილი უკვე გამოთქვეს „ნაციონალური მოძრაობისა“ და „ევროპული საქართველოს“ მერობის კანდიდატებმა. ასევე, აქტიური მოლაპარაკებები მიმდინარეობს მმართველი გუნდის კანდიდატთანაც.

შეხვედრის ინიციატივა სამ ორგანიზაციას ეკუთვნის. ესენი არიან: „ეთნოსთა შორის თანამშრომლობისა და კონსულტაციების ანალიტიკური ცენტრი“, „სამოქალაქო ინტეგრაციის ფონდი“ და „მრავალეროვანი საქართველო“.