„ახლოვდება აღმოსავლეთ პარტნიორობის სამიტი, ასევე, მომავალ წელს გაიმართება ნატოს სამიტი და ჩვენ უნდა ვიყოთ მზად იმისათვის, რომ კიდევ უფრო დიდი და მნიშვნელოვანი ნაბიჯები გადავდგათ როგორც ინტეგრაციული თვალსაზრისით, ისე ქვეყნის შიგნით მიმდინარე რეფორმების თვალსაზრისით, სადაც, მინდა გითხრათ, რომ როგორც ექსპერტული, ისე ფინანსური კონტრიბუცია დანიის არის ძალიან დიდი“-განაცხადა ევროპულ და ევროატლანტიკურ სტრუქტურებში ინტეგრაციის საკითებში სახელმწიფო მინისტრმა ვიტორ დოლიძემ დანიის სამეფოში სამუშაო ვიზიტის დასრულების შემდეგ. 21-22 სექტემბერს, ვიზიტის ფარგლებში, სახელმწიფო მინისტრმა შეხვედრები გამართა დანიის საგარეო საქმეთა სამინისტროს სახელმწიფო მდივანთან საგარეოპოლიტიკის საკითხებში ბერლინგ ლიზბერგთან,მუდმივმოქმედი სახელმწიფო მდივნის მოადგილესთან მიქელ სტარბეკ კრისტენსენთან (პრემიერ- მინისტრის აპარატი) და პარლამენტის (Folketing)საგარეო პოლიტიკის, თავდაცვის და ევროპული კომიტეტების წევრებთან. ასევე, სახელმწიფო მინისტრმა მონაწილეობა მიიღო დანიის საერთაშორისო კვლევების ინსტიტუტში (DIIS) მრგვალი მაგიდის ფორმატში პოლიტიკური მკვლევარებისა და ანალიტიკოსების მონაწილეობით გამართულ დისკუსიაში.
შეხვედრებზე განსაკუთრებული ყურადღება გამახვილდა ნოემბერში დაგეგმილი აღმოსავლეთ პარტნიორობის სამიტისთვის მზადებასა და მოლოდინებზე. სახელმწიფო მინისტრმა აღნიშნა, რომ საქართველოს მთავრობა აქტიურად მუშაობს ევროპელი პარტნიორების პოლიტიკური მხარდაჭერის კონსოლიდაციის მიმართულებით. აგრეთვე, გამოთქვა იმედი სხვადასხვა სფეროში, მათ შორის განათლების მიმართულებით, კიდევ უფრო მეტი დახმარების პროგრამების განხორციელების თაობაზე.
შეხვედრებზე, ასევე, იმსჯელეს ანტიდასავლური პროპაგანდის საფრთხეებსა და მისი განეიტრალების მექანიზმებზე.