საქართველოს დელეგაცია, პრემიერის ხელმძღვანელობით, გაერო-ს გენერალური ასამბლეის 72-ე სესიის ფარგლებში, ნიუ იორკში მნიშვნელოვან შეხვედრებს გამართავს, - ამის შესახებ პირველ არხთან საუბრისას გაერო-ში საქართველოს ელჩმა, კახა იმნაძემ განაცხადა.

„სამშაბათს იხსნება გაერო-ს გენერალური ასამბლეის 72-ე სესია, რომელზეც საქართველოს დელეგაცია წარმოდგენილია პრემიერ-მინისტრის ხელმძღვანელობით. პროგრამა უკვე იწყება ორშაბათიდან და ტრადიციულად, დებატების გახსნამდე ერთი დღით ადრე იმართება მაღალი დონის შეხვედრები გაერო-ს გენერალური მდივნის სახელით, რომლის თანამასპინძელი, გენერალურ მდივანთან ერთად, იქნება ამერიკის შეერთებული შტატების პრეზიდენტი. ეს იქნება ღონისძიება გაერო-ს რეფორმასთან დაკავშირებით, რომელშიც მონაწილეობას მიიღებს საქართველოს პრემიერი. ასევე, გაერო-ს ადამიანის უფლებათა საბჭოს რეფორმასთან დაკავშირებით, ამერიკის ვიცე-პრეზიდენტი მართავს ღონისძიებას, სადაც მონაწილეობას ასევე მიიღებს საქართველოს პრემიერ-მინისტრი“, - განაცხადა კახა იმნაძემ.

ელჩის თქმით, ორივე შემთხვევაში მნიშვნელოვანია ქართული მხარის მონაწილეობა, რადგან გაერო-ს წევრი სახელმწიფოების უმრავლესობა ესწრება ამ ღონისძიებებს და საქართველო სამი წლით არის გაერო-ს ადამიანის უფლებათა საბჭოს წევრი. გენერალური დებატების გახსნის შემდეგ, 21 სექტემბერს საქართველოს პრემიერი სიტყვით მიმართავს გენერალურ ასამბლეას, მანამდე კი, ელჩის ინფორმაციით, იგეგმება ორი მნიშვნელოვანი ღონისძიება. „ერთი ეხება ღია მმართველობას. ჩვენ საფრანგეთისგან გადმოვიბარებთ თავმჯდომარეობას და ასევე ვართ ამ ღონისძიების თანაორგანიზატორები. ამ შეხვედრის შემდეგ კი გაიმართება შეხვედრა ინოვაციური დაფინანსების შესახებ, რომელიც შეეხება მდგრადი განვითარების 20/30 მიზნებს. ამ შემთხვევაშიც საფრანგეთი არის თავმჯდომარე და ორგანიზატორი ქვეყანა და ჩვენ მისგან გადმოვიბარებთ ლიდერის პოზიციას. ეს მეტად მნიშვნელოვანია, რადგან მდგრადი განვითარების მიზნები არის უმნიშვნელოვანესი დოკუმენტი, რომლის განხორციელება დაფინანსების გარეშე წარმოუდგენელია. მსოფლიო მუშაობს ინოვაციური დაფინანსების წყაროების მოპოვებაზე და საქართველოს ამ მხრივ აქვს გარკვეული წარმატებები. სწორედ ამ მხრივ შეირჩა საქართველო, რომ გახდეს ქვეყანა, რომელიც ამ მიმართულებით საფრანგეთისგან გადაიბარებს ინიციატივას“, - აღნიშნა კახა იმნაძემ პირველ არხთან საუბარში.

ელჩის ინფორმაციით, გენერალური ასამბლეის ფარგლებში, იგეგმება ორმხრივი შეხვედრები როგორც პრემიერის, ასევე საგარეო საქმეთა მინისტრის დონეზე. მიხეილ ჯანელიძე ერთ-ერთ პირველ შეხვედრას ევროკავშირის პოლიტიკურ დირექტორებთან გამართავს.