ლონდონი დღესაც ტერორისტული თავდასხმის სამიზნე გახდა. „პარსონ გრინის“ მეტროპოლიტენში მომხდარი აფეთქების შედეგად 22 ადამიანია დაშავებული.
მატარებლის ერთ-ერთ ვაგონში პოლიეთილენის პარკში შეფუთულ სათლში მოთავსებული ასაფეთქებელი მოწყობილობა აფეთქდა. პოლიციის ინფორმაციით, მოწყობილობა წამმზომიანი მექანიზმი იყო, რომელიც სრულად არ ამოქმედდა.
მომხდარს ტერაქტის კვალიფიკაცია მალევე მიენიჭა. ტელეკომპანია ,,სქაი ნიუსის” ინფორმაციით, ეჭვმიტანილი უკვე იდენტიფიცირებულია. მისი ვინაობის დადგენა სათვალთვალო კამერების შესწავლის შედეგად მოხერხდა. თუმცა სახელი და გვარი ამ ეტაპზე მედიისთვის უცნობი რჩება.
უსაფრთხოების ზომებიდან გამომდინარე, „პარსონ გრინისა“ და ამავე სარკინიგზო ხაზის რამდენიმე მეტროსადგურმა დროებით ფუნქციონირება შეწყვიტა.