პარლამენტის თავმჯდომარის ირაკლი კობახიძის განცხადებით, ის მიზანი, რაც „სასოფლო-სამეურნეო დანიშნულების მიწის საკუთრების შესახებ“ კანონში იყო ჩამოყალიბებული, სრულიად უცვლელი რჩება.
პირველ არხთან საუბარში ირაკლი კობახიძე ყურადღებას უმრავლესობის მიერ მომზადებულ საკანონმდებლო ინიციატივაზე ამახვილებს, რომლის გათვალისწინებით, სასოფლო-სამეურნეო დანიშნულების მიწის ნაკვეთებზე საკუთრების უფლების შეძენის-შეჩერების შესახებ დადგენილი მორატორიუმი კომერციულ ბანკებსა და მიკროსაფინანსო ორგანიზაციებზე არ გავრცელდება.
სპიკერის თქმით, მმართველი გუნდის პოლიტიკური ნება იყო, რომ საქართველოს კონსტიტუციაში მიწის შესახებ ჩანაწერი გამკაცრებულიყო.
„შესაბამისი ტექსტი ძალიან მკაცრი ფორმით არის ჩამოყალიბებული, რომელიც მიწის გასხვისების საკითხს არეგულირებს და უზუნველყოფილია ის, რომ ქართული მიწა მხოლოდ საქართველოს მოქალაქეებისა და საქართველოში რეგისტრირებული იურიდიული პირების საკუთრებაში იქნება. ჩვენ ასევე მორატორიუმის შესახებ კანონი მივიღეთ, რომელსაც იგივე მიზანი ჰქონდა, რომ მიწის გასხვისება არამოქალაქეებზე შეჩერებულიყო. ეს ჩვენი პოლიტიკური ნება იყო და ამ პოლიტიკური ნებიდან გამომდინარე იქნა მიღებული საკონსტიტუციო ცვლილებები და ასევე, მორატორიუმის შესახებ კანონი“, - აცხადებს სპიკერი.
კობახიძე კიდევ ერთხელ განმარტავს, რომ მცირე ცვლილებები, რომელიც მორატორიუმის შესახებ კანონში შედის, დაკავშირებულია ბანკების ოპერაციებთან და მას მიწის გასხვისების კუთხით, საქართველოს არამოქალაქეებზე არავითარი კორექტივი არ შეაქვს.
„კერძოდ, ბანკებს ორი წლის ვადაში შესაბამისი მიწის გასხვისება ევალებათ. მიწის გასხვისება ისევ და ისევ საქართველოს მოქალაქეებსა და ქართულ იურიდიულ პირებზე უნდა მოხდეს. აქედან გამომდინარე, ის მიზანი, რაც მორატორიუმის კანონში იყო ჩამოყალიბებული, სრულიად უცვლელი რჩება“, - დასძინა კობახიძემ.
პარლამენტი აღნიშნულ ცვლილებებს დაჩქარებული წესით განიხილავს, რომლის გათვალისწინებით, კომერციულ ბანკებს ვალდებულება წარმოეშობათ, სასოფლო-სამეურნეო დანიშნულების მიწის ნაკვეთებზე საკუთრების უფლების მოპოვებიდან ორი წლის ვადაში, მიწა შესაბამის უფლებამოსილ პირზე გაასხვისონ. წარმოდგენილი ცვლილებებით, ასევე გათვალისწინებულია, საქართველოს მთავრობისთვის დისკრეციული უფლებამოსილის მინიჭება, მორატორიუმიდან გამონაკლის დაშვებასთან დაკავშირებით, შესაბამისი გადაწყვეტილება მიიღოს. საკანონმდებლო ორგანომ მიწის ნაკვეთების გასხვისებაზე მორატორიუმი საგაზაფხულო სესიაზე გამოაცხადა.