უკრაინელი პოლიტოლოგებისგან რადიკალურად განსხვავებულია მიხეილ სააკაშვილის ქართველი თანაგუნდელების პროგნოზი.
ნაციონალური მოძრაობის ლიდერები ოდესის ყოფილი გუბერნატორის მზარდ პოლიტიკურ გავლენებზე მიუთითებენ და საქართველოს ხელისუფლებას მოუწოდებენ, მიხეილ სააკაშვილს ქვეყანაში დაბრუნების და ქართულ პოლიტიკაში ჩართვის საშუალება მისცეს.
ექსპრეზიდენტის წინააღმდეგ საქართველოში აღძრული სისხლის სამართლის საქმეების პოლიტიკურ მოტივზე საუბრობენ ნაციონალური მოძრაობიდან გამიჯნული ევროპული საქართველოს წევრებიც, რომლებიც უკრაინიდან სააკაშვილის ექსტრადირებას გამორიცხავენ.
მმართველი გუნდი კი ფიქრობს, რომ ხელისუფლებამ უკრაინულ მხარეს ყოფილი პრეზიდენტის დაკავება-გადმოცემის თხოვნით კიდევ ერთხელ უნდა მიმართოს და მისი ექსტრადირებისთვის ყველა საშუალება გამოიყენოს.
ქართული ოცნების ლიდერთა თქმით, მიხეილ სააკაშვილი ავანტიურისტი პოლიტიკოსია, რომელიც ამჯერად უკრაინას უქმნის პრობლემებს.