16 სექტემბერს საქართველოს გაერთიანებული პროფკავშირების თავმჯდომარის არჩევნებია.
პირველად ბოლო 12 წლის განმავლობაში ამ თანამდებობის დაკავების სურვილს ირაკლი პეტრიაშვილის გარდა, კიდევ ორი კანდიდატი გამოთქვამს - სახელოვნებო პროფკავშირების ხელმძღვანელი დავით ოქიტაშვილი და ენერგეტიკოსთა პროფესიული გაერთიანების ხელმძღვანელი ამირან ზეინაშვილი.
პეტრიაშვილის კონკურენტები საარჩევნო კამპანიას ხმაურიანი ბრალდებებით იწყებენ. ერთ-ერთი სადავო საკითხი პროფკავშირების ქონებაა, რომელზეც სამწუხაროდ დაზუსტებული ინფორმაციის მოპოვება ვერ ხერხდება.
ოქიტაშვილის ადვოკატები პროკურატურას მიმართავენ და გამოძიების დაწყებას ითხოვენ. თავად მოქმედი თავმჯდომარე ბრალდებებს კატეგორიულად უარყოფს და მის წინააღმდეგ მიზანმიმართულ კამპანიაზე საუბრობს, კონკურენტებს კი ხელისუფლების მიერ მართულებს უწოდებს.
პროფკავშირების ბალანსზე არსებული ქონების სახელმწიფოსთვის დაბრუნების მოთხოვნა იყო ზეწოლის მიზანი, რომელიც როგორც გაერთიანების ყოფილი თავმჯდომარე ირაკლი ტუღუში აცხადებს, მასზე განხორციელდა.
ჩვენ დავინტერესდით, რა ქონების მფლობელია დღეს გაერთიანებული პროფკავშირები და სარგებლობენ თუ არა რიგითი წევრები სახელმწიფოსგან თავის დროზე გადაცემული ქონებით? აღმოჩნდა, რომ დღეს არავინ იცის, რა ქონებას ფლობს ორგანიზაცია, თავად პეტრიაშვილის გარდა.
გრძელი, ჩახლართული მოვლენების ისტორიები პროფკავშირებში გრძელდება, პროფკავშირული საგა ნახეთ იმედა დარსალიას რეპორტაჟში.