ევროკავშირის უმაღლესი კომისარი საგარეო პოლიტიკისა და უსაფრთხოების საკითხებში ფედერიკა მოგერინი აცხადებს, რომ თურქეთი ისევ არის ევროკავშირის წევრობის კანდიდატი ქვეყანა და მოლაპარაკებები ამ მიმართულებით ოფიციალურ ანკარასთან გაგრძელდება.
„გაწევრიანების შესახებ მოლაპარაკებებს აქვს გარკვეული კრიტერიუმები. ჩვენ მძიმე წლები გამოვიარეთ. ვადევნებთ თვალყურს იმ განცხადებებს, რაც ევროკავშირში და თურქეთში კეთდება და ვიმედოვნებთ, რომ მოვახერხებთ მოლაპარაკების მაგიდასთან დასხდომას და იმის განსაზღვრას, თუ როგორი უნდა იყოს ჩვენი ურთიერთობები სამომავლოდ“ - აცხადებს მოგერინი.
ფედერიკა მოგერინის ამ განცხადებამდე ერთი დღით ადრე საკმაოდ ხისტი განცხადებები გაკეთდა გერმანიაში. ტელედებატების დროს ქვეყნის კანცლერმა ანგელა მერკელმა და მისმა ოპონენტმა სოციალურ-დემოკრატიული პარტიიდან, მარტინ შულცმა განაცხადეს, რომ ანკარას ამჟამინდელი კურსით თურქეთის ადგილი ევროპაში არ არის.
პარალელურად, განცხადება გააკეთა თურქეთის საგარეო საქმეთა მინისტრმა მევლუთ ჩავუშოღლუმ. ის ამბობს, რომ თურქეთის სტრატეგიული მიზანი სწორედ ევროკავშირში გაწევრიანებაა.
„ევროკავშირი თურქეთისთვის კვლავ სტრატეგიული მიზანია. ეს იყო ჩვენი არჩევანი, გვინდოდა, ვყოფილიყავით ამ ორგანიზაციის სრულფასოვანი წევრი. თურქეთს არ აქვს პრობლემა, დაიწყოს მოლაპარაკებების ახალი ეტაპი. ჩემი აზრით, პრობლემა სხვა რამეა და ის პოლიტიკურია. სწორედ პოლიტიკური დაბრკოლებებია ახლა ჩვენი მთავარი გამოწვეევა“ - აცხადებს თურქეთის საგარეო საქმეთა მინისტრი.