გაერთიანებული პროფკავშირების დარგების ხელმძღვანელების ნაწილი დავით ოქიტაშვილისთვის დელეგატთა სიის გადაცემაზე უარს აცხადებს.

როგორც მათ დღეს გამართულ პრესკონფერენციაზე განაცხადეს, სიების გადაცემას ოქიტაშვილისთვის არ აპირებენ, რადგან ფიქრობენ, რომ დელეგატებზე შეიძლება ზეწოლა მოახდინოს.

"ოქიტაშვილი 40 დარგობრივი სხდომიდან მხოლოდ ოთხზეა ნამყოფი. შესაბამისად მას ვერ ექნებოდა ინფორმაცია, როგორ უნდა მოქცეულიყო გამგეობის წევრი ორგანიზაცია, რათა დელეგატებთან წვდომა ჰქონოდა. არანაირი ვალდებულება სამანდატო კომისიას არ აქვს, რომ კანდიდატს გადასცეს დელეგატის სიები. როდესაც ადამიანი არჩევნებში მონაწილეობას გეგმავს, თავიდანვე უნდა იყოს ჩართული პროცესებში, მაქსიმალურად უნდა შეეცადოს, გამოიყენოს ყველა საშუალება, რომ წვდომა ჰქონდეს დელეგატებთან, რათა თავისი პროგრამა წარუდგინოს. ამის მაგვარი არაფერი არ მომხდარა. შესაბამისად, როცა ყველა პროცედურა დამთავრდა, ახლა ეს ვალდებულება ჩვენ წესდებით არ გვაქვს, რომ დელეგატთა სია გადავცეთ. წერილობით რომ მიემართა ჩვენთვის, ჩვენ რა თქმა უნდა, ამაზე ვიფიქრებდით და გავცემდით შესაბამის პასუხს. ჩემი დარგის გადაწყვეტილებაა, რომ სიები არ მივცეთ", - განაცხადა გაერთიანებული პროფკავშირების სამანდატო კომისიის თავმჯდომარე ზვიად ჭინჭარაულმა.

გაერთიანებული პროფკავშირების თავმჯდომარეს 22 დარგის 225 დელეგატი 15-16 სექტემბერს აირჩევს.