პრინცესა დაიანა პარიზში, ავტოკატასტროფაში 1997 წლის 31 აგვისტოს დაიღუპა. მისი გარდაცვალებიდან დღეს 20 წელი გავიდა.

„პრინცესა დაიანა" მისი არაოფიციალური ტიტულია. ასე პრინცი ჩარლზის პირველ მეუღლეს ჟურნალისტებმა დაარქვეს. ჟურნალისტების ეს წოდება კი, მერე მთელმა მსოფლიომ აიტაცა და არაერთი სახელი დაარქვა - „უელსის პრინცესა", უფრო ზუსტად კი - "დაიანა, ჩარლზის უელსელი პრინცესა“, ყველაზე ზუსტად კი -ალბათ „ხალხის პრინცესა“.

ბრიტანეთის სამეფო ოჯახის წევრი, პრინცესა დაიანა 1961 წლის 1 ივლისს დაიბადა. ამბობენ, რომ ბავშვობიდან პრინც ჩარლზის გაცნობაზე ოცნებობდა.

დაიანა სპენსერმა პრინცი ჩარლზი საქველმოქმედო საღამოზე გაიცნო. წყვილი 1981 წელს, ივლისში დაქორწინდა. იმ დროს ლედი დი 20, პრინცი ჩარლზი კი 29 წლის იყო. ქორწილი 2500 ადამიანის თანდასწრებით შედგა. მსოფლიო მედიის საშუალებით კი, ქორწილი 750 მილიონმა ადამიანმა იხილა .

დაიანა სპენსერსა და პრინც ჩარლზს ორი შვილი ჰყავთ - პრინცი უილიამი და პრინცი ჰარი. თუმცა, მათი თანაცხოვრება 1996 წელს 28 აგვისტოს ოფიციალურად განქორწინებით დასრულდა.