თავდაცვის ინსტიტუციური აღმშენებლობის სკოლა (DIB) თავდაცვისა და უსაფრთხოების საკითხებზე ცნობიერების ამაღლების მიზნით, რეგიონებში სემინარების ციკლს იწყებს. პირველი კურსი თემაზე „ეროვნული უსაფრთხოება და საინფორმაციო პროპაგანდა“ სკოლის ორგანიზებით, ყაზბეგის მუნიციპალიტეტში, სასტუმრო „სნოში“იმართება, რომელშიც მცხეთა-მთიანეთის რეგიონის საჯარო და არასამთავრობო სექტორის წარმომადგენლები, ასევე, ადგილობრივი სასულიერო პირები მონაწილეობენ.
უსაფრთხოების სფეროს ექსპერტები მათ სამი დღის განმავლობაში ჰიბრიდული ომის სპეციფიკაზე, საფრთხეებსა და მასთან გამკლავების საშუალებებზე, საბრძოლო მოქმედებების ევოლუციაზე ინფორმაციას აწვდიან. სემინარის ფარგლებში, მსმენელები ინფორმაციას საქართველოს ეროვნული უსაფრთხოების პოლიტიკასა და თავდაცვის რეფორმების შესახებაც მიიღებენ. ტრენინგი ინტერაქტიურ რეჟიმში, პრაქტიკული სავარჯიშოების გამოყენებით მიმდინარეობს.
კურსი გუშინ დაიწყო და 23 აგვისტოს დასრულდება. აღნიშნული პროექტი უწყებათშორის ხასიათისაა და ნატოსა და ევროკავშირის შესახებ საინფორმაციო ცენტრისა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მხარდაჭერით ხორციელდება.