თბილისში ელექტრონული მუსიკის გამორჩეული არტისტი ნიკოლას ჯაარი დაუკრავს. მუსიკოსი საქართველოში ელექტრონული მუსიკისა და ციფრული ხელოვნების ფესტივალების სერიის - DECODE-ის ფარგლებში ჩამოდის.

ფესტივალი თვეში ერთხელ სხვადასხვა მისამართზე გაიმართება. ერთდღიანი ფესტივალის მუსიკალური პროგრამა ელექტრონული მუსიკის სხვადასხვა მიმართულებას მოიცავს და გამორჩეული საერთაშორისო და ადგილობრივი არტისტებით იქნება დაკომპლექტებული.

DECODER-ის კონცეფცია ელექტრონული მუსიკისა და ციფრული ხელოვნების სფეროში არსებული ტექნოლოგიებისა და ინოვაციური ფორმების ფართოდ გავრცელებას ემყარება. მთავარი აქცენტი განათებისა და ხმის სინთეზზე კეთდება, სადაც მუსიკოსებს, მხატვრებსა და ინჟინრებს შესაძლებლობა ექნებათ, საკუთარი ხედვა და გამოცდილება მსმენელს გაუზიარონ.

ფესტივალის ფარგლებში, მსმენელს საშუალება ექნება არტისტებისა და სფეროს პროფესიონალების მიერ გამართულ სამუშაო შეხვედრებს დაესწროს, სადაც აუდიო-ვიზუალური ხელოვნების სიახლეების გაცნობისა და პანელ-დისკუსიებში მონაწილეობის საშუალება ექნება.

DECODER-ის პირველი სერია, 21 სექტემბერს მულტიფუნქციურ საკონცერტო დარბაზ SPACEHALL-ში გაიმართება და ელექტრონული მუსიკის უმნიშვნელოვანეს ფიგურას - NICOLAS JAAR-ს უმასპინძლებს, რომლის შემოქმედებას პროფესიული მუსიკალური განათლებისა და მრავალფეროვანი გამოცდილების გამო განსაკუთრებული შინაარსი აქვს.

მისი სადებიუტო ალბომი SPACE IS ONLY NOISE 2011 წელს RESIDENT ADVISOR-ის, MIXMAG-ის და CRACK MAG-ის მიერ წლის საუკეთესო ალბომად დასახელდა, მომდევნო სამი წლის განმავლობაში საუკეთესო ცოცხალი შესრულების მქონე არტისტის ტიტული ჰქონდა.

2015 წელს, ნიუ-იორკში დაფუძნებულ ლეიბლზე OTHER PEOPLE გამოვიდა NICOLAS JAAR-ის ალბომი POMEGRANATES, რომელიც მი კარიერაში საუკეთესო ნამუშევრად ითვლება. ალბომი შთაგონებულია კინორეჟისორის სერგო ფარაჯანოვის ავანგარდული ფილმით - „ბროწეულის ფერი“, რომელიც თბილისელი აშუღი პოეტის საიათნოვას ბიოგრაფიაზე მოგვითხრობს. 20 კომპოზიციისგან შემდგარი POMEGRANATES ამ ფილმის ალტერნატიული საუნდტრეკია.

სოლო ნამუშევრების გარდა, მულტიინსტრუმენტალისტთან, DAVE HARRINGTON-თან ერთად ცნობილი ექსპერიმენტულ ჟღერადობაზე ორიენტირებული პროექტის DARKSIDE-ის წევრია.

ფესტივალისა და პროექტის მენეჯერი მირიან ჯეჯელავა პირველ არხთან საუბარში აცხადებს, რომ ამ ტიპის ფესტივალის დაარსება ძალიან მნიშვნელოვანია, რადგან ის არტისტებისა და ციფრული ხელოვნების კოლაბორაციაა.

მისი თქმით, ნიკოლას ჯაარი ელექტრონული მუსიკის გამორჩეული წარმომადგენელია. მისი შემოქმედება კი ძალზედ მასშტაბურია.