თბილისის საქალაქო სასამართლოში ჭონქაძის ქუჩაზე მოკლული კახა ძნელაძის მეუღლე ვანდა იმნაძე მივიდა.
ძნელაძის მეუღლე სხდომათა დარბაზში შესვლას ცდილობდა, სადაც მკვლელობაში ბრალდებულ მიხეილ იაშვილს სასწრაფოს ექიმები სამედიცინო დახმარებას უწევენ.
მანდატურის თანამშრომლებმა ვანდა იმნაძე დარბაზში არ შეუშვეს. ის სიტყვიერად დაუპირისპირდა ბრალდებულ მიხეილ იაშვილის ადვოკატს.
"ამ მკვლელს როგორ იცავ. გულგაგლეჯილი მეუღლე მყავს სახლში. ეგ რომ გათავისუფლდეს ღორივით მოვკლავ", - ხმამაღალი შეძახილით მიმართავდა მოკლულის ცოლი ბრალდებულის ადვოკატს და ახლობლებს.
მმოკლულის მეუღლე ჟურნალისტებს მიმართავს, რომ ფაქტებს ნუ ამახინჯებენ. მისი თქმით, მისმა მეუღლემ ბრალდებული იაშვილი წარსულში სცემა იმის გამო, რომ ტაქსებს ფულს ართმევდა და არა იმის გამო, რომ ტაქსის ბიზნესი ვერ გაიყვეს.
მანდატურის სამსახურმა ვითარება განმუხტა. ვანდა იმნაძე სასამართლოს ეზოში რჩება.