საქართველოს ყოფილი პრეზიდენტი, ოდესის ყოფილი გუბერნატორი მიხეილ სააკაშვილი აცხადებს, რომ უკრაინაში შეპარვას ან ვინმეს საბარგულით შესვლას არ აპირებს. ამის შესახებ მან „ფეისბუქში“ საკუთარ გვერდზე პირდაპირი ჩართვისას განაცხადა. მისი თქმით, ლვოვიდან 10 სექტემბერს ჩავა კიევში, ლვოვში კი პოლონეთიდან გადავა. მისივე თქმით, კიევიდან ოდესაში დაბრუნებას აპირებს.
„პოროშენკომ თავი შეირცხვინა და მისი გადაწყვეტილების შემდეგ, პირველი, ვინც განცხადება გააკეთა, მედვედევი იყო, მას შემდეგ რუსული არხები გამუდმებით ჩემზე საუბრობენ. მე ღიად ვაცხადებ, რომ არ ვაპირებ უკრაინაში შეპარვას ან ვინმეს საბარგულით შესვლას. იმისთვის არ მიშრომია და არ მიცხოვრია, რომ სადმე საბარგულით შევიპარო. მე არ ვიცი, რა საფრთხეს წარმოვადგენ პოროშენკოსთვის, მაგრამ როგორც ჩანს, მართლაც ამ ოლიგარქებისთვის დიდ საფრთხეს წარმოვადგენ და არც ვაპირებ, იმედი გავუცრუო მათ. მე წავალ სასამართლოში, რადგან პოროშენკომ ყველანაირი კანონი დაარღვია, უკრაინის კანონმდებლობაც და საერთაშორისო სამართლის ნორმებიც. მე მზად ვარ, წარვდგე უკრაინის სასამართლოს წინაშე.
მე ვცხოვრობ უკრაინაში, ჩემი სახლი უკრაინაშია, მე ვარ ერთ-ერთი უკრაინული მოძრაობის შექმნის ინიციატორი, ჩემი ნივთები უკრაინაშია, ჩემი მეგობრები უკრაინაში ცხოვრობენ და მართალია, მე წამართვეს ყველაფერი არაადამიანურად და არაკაცურად, მაგრამ გადავიტან. ბევრი უკრაინელი მწერს, რომ მზად არიან მიმიღონ“, - განაცხადა სააკაშვილმა.
საქართველოს ყოფილმა პრეზიდენტმა ცხელი ხაზის ნომერი გაამხილა და აღნიშნა, რომ ხალხს შეუძლია მას ამ ნომერზე დაუკავშირდეს.
მიხეილ სააკაშვილმა პარალელი გაავლო პეტრო პოროშენკოსა და შევარდნაძეს შორის და გაიხსენა, რომ პოლიტიკოსების ნაწილი ფიქრობდა, სააკაშვილი და შევარდნაძე რამეზე შეთანხმდებიან. მისი თქმით, იგივეს ამბობენ დღესაც, თუმცა ეს შეუძლებელია.
„ჩემსა და პოროშენკოს შორის შეთანხმება ვერ მიიღწევა, რადგან ის ჩემგან რადიკალურად განსხვავებული ადამიანია, ის ორიენტირებულია ფულის კეთებაზე, მე კი ორიენტირებული ვარ, რომ ადამიანებმა, ვინც პოლიტიკაში არიან, ხალხის ხარჯზე ფული არ აკეთონ“ - განაცხადა საქართველოს ყოფილმა პრეზიდენტმა მიხეილ სააკაშვილმა.
მან განაცხადა, რომ უკრაინელი ხალხის იმედი აქვს, სამართლიანობამ გაიმარჯვოს და უკრაინელ ხალხს მისი იმედი უნდა ჰქონდეს. „პოროშენკო და გროისმანი თქვენ ფულს იპარავენ“ - ამ სიტყვებით მიმართა სააკაშვილმა Facebook Live-ის დროს უკრაინელ ხალხს.