მთაწმინდის ფერდობზე აღწერითი სამუშაოები გრძელდება. მიმდინარეობს დამწვარი ტერიტორიების დათვალიერება-შესწავლა. ადგილზე თბილისის მერიის გამწვანების სამსახურის თანამშრომლები იმყოფებიან.
სწორედ ნახანძრალი კერების შესწავლის შემდეგ დაიგეგმება შემდგომი ღონისძიებები. ბოლო მონაცემებით, გუშინ ღამით გაჩენილი ხანძრის შედეგად მთაწმინდის ფერდობზე ორ ჰექტრამდე ტერიტორია დაიწვა.
ცეცხლი ძირითადად ბალახსა და ბუჩქნარზე გავრცელდა. ვითარებას ქარი, ცუდი ხილვადობა და რთული რელიეფური პირობები კიდევ უფრო ართულებდა. ადგილზე 11 სახანძრო-სამაშველო ბრიგადა იყო მობილიზებული, რომლებმაც ხანძრის კერების ლოკალიზება დაახლოებით ორ საათში მოახერხეს.
მეხანძრეებმა დროული და ოპერატიული რეაგირებისთვის დღეს პრემიერისგან მადლობა მიიღეს. საბედნიეროდ, შემთხვევის შედეგად, არავინ დაშავებულა. საგანგებო სიტუაციების მართვის სააგენტოს მეხანძრე-მაშველები ადგილზე მთელი ღამის განმავლობაში პატრულირებდნენ.