საქსტატი ეკონომიკური ზრდის ივნისის თვის წინასწარ მაჩვენებელს აქვეყნებს. უწყების ინფორმაციით, მთლიანი შიდა პროდუქტი 4.6 პროცენტით გაიზარდა. ამასთან, მიმდინარე წლის მეორე კვარტალში ეკონომიკური ზრდის საშუალო მაჩვენებელი 4 პროცენტი იყო, იანვარ-ივნისში კი 4.5 პროცენტი. შესაბამისად, 6 თვის ეკონომიკური ზრდა ბიუჯეტში ჩადებულ 4-პროცენტიან პროგნოზს აღემატება.

რაც შეეხება ივნისის სხვა ეკონომიკურ მაჩვენებლებს, წლიური ინფლაცია 7.1 პროცენტი იყო, მაისთან შედარებით კი სამომხმარებლო ფასები 0.4 პროცენტით შემცირდა.

საქართველოდან პროდუქციის ექსპორტი 30,1 პროცენტით გაიზარდა, იმპორტი კი 8.8 პროცენტით. შედეგად, საგარეო ვაჭრობის მთლიანი ბრუნვა, წინა წელთან შედარებით, 13.5 პროცენტით გაიზარდა.

ივნისში საქართველოში 4474 ახალი საწარმო დარეგისტრირდა (წინა წელთან შედარებით ზრდამ 15.8% შეადგინა). სახელმწიფო ბიუჯეტის შემოსავლებმა 718,1 მილიონი ლარი შეადგინა, ხარჯებმა კი 790.6 მილიონი ლარი.