ლიტვის პრეზიდენტი დალია გრიბაუსკაიტეს ინფორმაციით, რუსეთისა და ბელორუსის ერთობლივი წვრთნების „დასავლეთი - 2017“ დროს შეერთებული შტატები ლიტვაში ამერიკელი სამხედროების, ტექნიკისა და საჰაერო პოლიციის შემადგენლობაში მყოფი ავიაგამანადგურებლების რაოდენობას გაზრდის, - ამის შესახებ რუსული მედია წერს.

რუსეთისა და ბელორუსიის ერთობლივი წვრთნები „დასავლეთი-2017“ ბელორუსის ტერიტორიაზე 14-20 სექტემბერს არის დაგეგმილი.

„წვრთნების დროს, აქ იქნება დისლოცირებული აშშ-დან უფრო მეტი სამხედრო მოსამსახურე, ტექნიკა, გემები და საჰაერო პოლიციის ორჯერ გაზრდილი შემადგენლობა, რაც ჩვენი რეგიონისადმი განსაკუთრებული ყურადღების მანიშნებელია“, - განაცხადა ლიტვის პრეზიდენტმა დალია გრიბაუსკაიტემ.

ლიტვაში, მაისის შემდეგ, სამხედრო პოლიციის მისიას პოლონეთის სამხედრო საჰაერო ძალები ოთხი ავიაგამანადგურებლით F-16 Fighting Falcon ახორციელებენ.

ლიტვის პრეზიდენტის განმარტებით, შემოდგომაზე კი შაულაის ბაზაზე აშშ-ს სამხედრო საჰაერო ძალების შემადგენლობა ჩავა, რომლებიც ბალტიის ქვეყნებში საჰაერო პოლიციის მისიას განახორციელებენ.

გასულ კვირას, ლიტვის სახელმწიფო უსაფრთხოების დეპარტამენტის ხელმძღვანელმა წვრთნები „დასავლეთი -2017“, ლიტვის ეროვნული უსაფრთხოებისთვის მთავარ გამოწვევად დაასახელა.