არაბული ქვეყნების მიერ კატარის დიპლომატიური იზოლაციიდან თვენახევრის შემდეგ, ქვეყნის შეიხი პირველ კომენტარს ავრცელებს - იუწყება BBC. ტამიმ ბენ ხამად ალ ტანიმ ოთხ არაბულ ქვეყანას - საუდის არაბეთს, არაბთა გაერთიანებულ საამიროებს, ეგვიპტესა და ბაჰრეინს კრიზისის დარეგულირებისკენ მოუწოდა. მისი განცხადება ადგილობრივმა მედიამ გაავრცელა. შეიხი ალ ტანი მიიჩნევს, რომ სპარსეთის ყურის ქვეყნების გადაწყვეტილება ეკონომიკური და დიპლომატიური სანქციების დაწესების შესახებ, მავნებლურ ზრახვებს ემსახურება და კატარში დესტაბილიზაციას ისახავს მიზნად. იგი მიიჩნევს, რომ არსებული კრიზისის დარეგულირება მხოლოდ იმ შემთხვევაში იქნება შესაძლებელი, თუ ზემოთ ჩამოთვლილი ქვეყნები კატარის სუვერენიტეტის მიმართ პატივისცემას გამოიჩენენ.
ტერორისტული ორგანიზაციების დაფინანსებისა და ირანთან ურთიერთობების ბრალდებით, ხუთმა არაბულმა სახელმწიფომ კატართან კავშირი 9 ივნისს გაწყვიტა. არაბთა გაერთიანებულმა საამიროებმა, საუდის არაბეთმა, ეგვიპტემ, ბაჰრეინმა და იემენმა კატარის ავიახაზებს საჰაერო სივრცე ჩაუკეტა.