ჰელმანდის პროვინციაში ორი დღის წინ განხორციელებული ტერაქტის ერთ-ერთი თვითმკვლელი ტერორისტი „თალიბანის“ ლიდერის, მულა ჰაიბატულა ახუნზადას შვილი იყო - იუწყება „როიტერი“. 23 წლის აბდურ რაჰმანმა თავი ქალაქ გერეშქში სამხედრო ბაზის მიმდებარე ტერიტორიაზე აიფეთქა.
თალიბების მიერ გავრცელებულ განცხადებაში წერია, რომ რაჰმანმა აღნიშნული გადაწყვეტილება თავად მიიღო და იგი ბოლო ერთი წლის განმავლობაში სწორედ ამ ტერაქტისთვის ემზადებოდა.
ტერორისტული აქტი სამმა თვითმკვლელმა ტერორისტმა ჰელმანდის პროვინციის ქალაქ გარეშქში სამხედრო ბაზასთან ახლოს მდებარე ტერიტორიაზე 20 ივლისს განახორციელა, რის შედეგადაც 6 ავღანელი ჯარისკაცი მძიმედ დაშავდა.
მულა ჰაიბატულა ტერორისტული ორგანიზაცია „თალიბანის“ ლიდერად 2016 წლის მაისში აირჩიეს. მისი წინამორბედი ახტარ მუჰამედ მანსური პაკისტანში ამერიკის შეერთებული შტატების მიერ განხორციელებული ავიაიერიშის შედეგად დაიღუპა.
ისლამური ექსტრემიზმის ისტორიაში გარეშქში მომხდარი ტერაქტი პირველი შემთხვევაა, როცა ტერორისტული ორგანიზაციის ლიდერის შვილი მონაწილეობას თვითმკვლელი ტერორისტის მისიით იღებს.