შეერთებული შტატების პრეზიდენტი, „დიდი ოცეულის“ სამიტის ფარგლებში, რუსეთის ლიდერთან გამართული შეხვედრის დეტალებზე ტელეკომპანია CBN-თან საუბრობს. დონალდ ტრამპის განცხადებით, მათ შესანიშნავი შეხვედრა ჰქონდათ და კარგად გაუგეს ერთმანეთს.
დონალდ ტრამპი განმარტავს, რომ ვლადიმერ პუტინი რუსეთის ინტერესებიდან გამომდინარე მოქმედებს, ისევე, როგორც თავად მისი ქმედებები შეერთებული შტატების ინტერესებს ემსახურება.
გამომდინარე იქიდან, რომ ორივე ქვეყანა ბირთული ზესახელმწიფოა, პრეზიდენტ ტრამპს მიაჩნია, რომ აუცილებელია დიალოგის ფორმატის არსებობა. თუმცა, დონალდ ტრამპი თვლის, რომ ვლადიმერ პუტინისთვის შეერთებული შტატების ადმინისტრაციაში ჰილარი კლინტონის ხილვა უფრო სახარბიელო იქნებოდა, რადგან ტრამპი სამხედრო პოტენციალის გაძლიერებისა და ენერგეტიკული რესურსების გაიაფების მომხრეა და უახლოეს პერიოდში მის ექსპორტსაც გეგმავს. ეს კი ვლადიმერ პუტინის ინტერესებს არ შეესაბამება, რადგან რუსეთი ეკონომიკურად ძირითადად ნავთობზე, გაზსა და ელექტროენერგიაზეა დამოკიდებული. ჰილარი კლინტონის გაპრეზიდენტების შემთხვევაში კი, ტრამპის თქმით, ენერგეტიკულ რესურსებზე მაღალ ფასებს ვიხილავდით, სამხედრო ბიუჯეტი კი შემცირდებოდა.
კიდევ ერთი საკითხი, რომელიც პრეზიდენტებმა განიხილეს და დონალდ ტრამპის მოსაზრებით, გარკვეულ წარმატებასაც მიაღწიეს, სირიის კონფლიქტი და ქვეყნის სამხრეთ-დასავლეთით ცეცხლის შეწყვეტის შეთანხმებაა, რომელიც ამ დრომდე ნარჩუნდება.