თურქეთის ხელისუფლებამ საინფორმაციო ტექნოლოგიების 105 სპეციალისტის დაკავების განკარგულება გასცა. მათ ბრალად შარშან ივლისში მოწყობილი პუტჩის მცდელობაში მონაწილეობა დასდეს. პოლიციამ 105 ეჭვმიტანილიდან 52 დააკავა. მათ შორის არიან თურქეთის სამეცნიერო კვლევითი ცენტრისა და სატელეკომუნიკაციო კომპანიის ყოფილი თანამშრომლები. გამოძიება ამტკიცებს, რომ დაკავებული პირები აქტიურად სარგებლობდნენ აპლიკაცია ByLock-ით, რომელსაც ხშირად იყენებენ აშშ-ში მცხოვრები მქადაგებლის ფეთჰულა გიულენის მხარდამჭერები.

მანამდე, თურქეთის ხელისუფლებამ ანალოგიური ბრალდებით უნივერსიტეტის 72 თანამშრომლის დაკავების ბრძანება გასცა. მათ შორის იყო თურქეთის მთავარი ოპოზიციური პარტიის ლიდერის ქემალ კილიჩდაროღლუს ყოფილი მრჩეველიც.

შარშან ივლისში მოწყობილი სახელმწიფო გადატრიალების შემდეგ თურქეთში 50 ათასი ადამიანი დააკავეს. ხოლო 150 ათასი სახელმწიფო მოხელე სამსახურიდან დაითხოვეს. მათ პუტჩში მონაწილეობაში ადანაშაულებენ. ამის გამო თურქეთის ხელისუფლებას უფლებადამცველები მუდმივად აკრიტიკებენ.