ქუთაისში ცენტრალური არქივის ახალი შენობა 12 ივლისს გაიხსნება, ამის შესახებ ჟურნალისტებს იუსტიციის მინისტრის მოადგილემ მიხეილ სარჯველაძემ და ეროვნული არქივის გენერალურმა დირექტორმა თეონა იაშვილმა მედიატურზე განუცხადეს. ცენტრალური არქივის ახალ შენობას 12 ივლისს იუსტიციის მინისტრი თეა წულუკიანი გახსნის.

როგორც საზოგადოებრივთან მინისტრის მოადგილემ მიხეილ სარჯველაძემ განაცხადა, ქუთაისის ცენტრალური არქივის ახალი შენობა გამორჩეულია საკუთარი ფონდებითა და კოლექციებით

„აქ დაცულია დოკუმენტები მეთვრამეტე საუკუნიდან დღემდე და მათი დაცვისათვის სათანადო პირობების შექმნა მომავალი თაობებისათვის საარქივო საგანძურის შემონახვას ემსახურება“, - განაცხადა საზოგადოებრივთან მინისტრის მოადგილემ.

შენობის დათვალიერებასთან ერთად ჟურნალისტებს საშუალება მიეცათ, ქუთაისის ცენტრალურ არქივში დაცული უძველესი და უნიკალური საარქივო მასალის ორიგინალები ენახათ.

იუსტიციის სამინისტროს ინფორმაციით, ქუთაისის ცენტრალურ არქივს პირველად აქვს ახალი შენობა, რომელიც დაპროექტებული და აგებულია საგანგებოდ საარქივო საჭიროებისათვის. შენობის არქივსაცავები მოწყობილია საერთაშორისო ნორმების გათვალისწინებით თანამედროვე ვენტილაცია-კონდიცირებისა და ხანძარსაწინააღმდეგო სისტემებით.

ქუთაისის ცენტრალური არქივი 1921 წელს ჩამოყალიბდა. უნიკალურ დოკუმენტებს შორის არქივში ინახება იმერეთის მეფეების − სოლომონ პირველისა და სოლომონ მეორეს სიგელებსა და წყალობის წიგნებს; მოსახლეობის აღწერის მასალებს; ილია ჭავჭავაძის, აკაკი წერეთლის, კონსტანტინე გამსახურდიას, გრიგოლ რობაქიძის, გალაკტიონ ტაბიძისა და სხვათა ავტოგრაფები; ქუთაისის კლასიკური და ქუთაისის სათავადაზნაურო გიმნაზიების დაარსების ამსახველ დოკუმენტები და სხვა მასალა.

ქუთაისის ცენტრალური არქივის თანამედროვე სტანდარტების საცავებში თავს მოიყრის ქუთაისის, წყალტუბოს, სამტრედიის, ონის, ამბროლაურის, ცაგერის, ლენტეხის, ხონის, ვანის, ბაღდათის, საჩხერის, ჭიათურისა და ტყიბულის 4334 საარქივო ფონდის 905 432 საქმე.

ეროვნული არქივის მხარდაჭერა პრიორიტეტულ მიმართულებად იუსტიციის მინისტრმა თეა წულუკიანმა 2012 წლის მიწურულს გამოაცხადა. ბოლო წლებში ეროვნული არქივის ინფრასტრუქტურული ბაზა მისი არსებობის განმავლობაში პირველად განახლდა და გაიზარდა. ბოლო ათწლეულებში პირველად აშენდა ეროვნული არქივის ახალი თანამედროვე შენობა რუსთავსა (ქვემო ქართლის რეგიონული არქივი) და ქუთაისში (ქუთაისის ცენტრალური არქივი); 2016 წელს გაიხსნა ეროვნული არქივის საგამოფენო პავილიონი, სადაც ფუნქციონირებს მედიათეკა, ბრენდირებული პროდუქციის მაღაზია და კაფე; სრული რეკონსტრუქცია ჩაუტარდა და თანამედროვედ აღიჭურვა არქივის შენობები ზუგდიდსა და თელავში.