„ნაციონალური მოძრაობა“ აფხაზეთის რეგიონალურ ორგანიზაციას აფუძნებს. როოგრც პარტიაში აცხადებენ, ორგანიზაციის მთავარი მიზანი დევნილთა უფლებებზე მუშაობა, დევნილების უფლებების დაცვა და ქვეყნის ერთიანობისთვის ბრძოლა იქნება. ორგანიზაციის სადამფუძნებლო კონფერენციაზე ამ ორგანიზაციის თავმჯდომარედ ბესო შენგელია დასახელდა.

„ორგანიზაციის მთავარი მესიჯია განახლებული „ნაციონალური მოძრაობა“ 20 იანვრის მერე. ზუსტად ეს არის „ნაციონალური მოძრაობა“, რომელიც ჩამოყალიბდა, გატარდა რეფორმები, რომელმაც მოგვცა იმის შესაძლებლობა, რომ შევქმნათ ძალიან ძლიერი, ათეულობით ათასი ადამიანით გაერთიანებული აფხაზეთის, რეგიონალური ორგანიზაცია, რომელიც იმუშავებს დევნილთა პრობლემატიკაზე. პარტიაში ძალიან ბევრი დევნილია გაერთიანებული სხვადასხვა კუთხიდან, რომლებიც დღეს აქ არიან წარმოდგენილნი. ცალსახად ვაცხადებთ, რომ „ერთიანი ნაციონალური მოძრაობის“ აფხაზეთის რეგიონალური ორგანიზაცია იქნება ერთ-ერთი მთავარი ძალა ივანიშვილის რეჟიმის დასასრულებლად საქართველოში. ჩვენ ვიზრუნებთ, დავიცავთ დევნილთა უფლებებს და ვაცხადებთ, რომ დამოუკიდებლობა აფხაზეთის გარეშე კოჭლია და ვიბრძოლებთ საქართველოს დამოუკიდებლობისა და მთლიანობისთვის", - განაცხადა ბესო შენგელიამ.

დღესვე დაფუძნდა ორგანიზაციის პოლიტსაბჭო. კონფერენციას ესწრებოდნენ პარტიის რეგიონული წარმომადგენლები. მათ სიტყვით მიმართა მიხეილ სააკაშვილმაც, რომელიც კონფერენციაზე სკაიპის საშუალებით ჩაერთო.