საკონსტიტუციო სასამართლოში მოსმენების კანონთან დაკავშირებული სარჩელების განხილვა პერსონალურ მონაცემთა დაცვის ინსპექტორის მოსმენით განახლდა. თამარ ქალდანს სასამართლოს პლენუმი გუშინ სამი საათის განმავლობაში უსმენდა, ამჯერად ის მხარეების შეკითხვებს პასუხობს.
რამდენად ეფექტურია მოსმენების ახალი კანონის მოქმედების პირობებში ინსპექტორის კონტროლის მექანიზმი -ეს არის მთავარი საკითხი, რომელზეც მსჯელობენ.
„კანონმდებლობა გვაძლევს შესაძლებლობას, როგორც ელექტრონული საშუალებებით, ასევე სტანდარტული ინსპექტირებით შევამოწმოთ როგორც ტექნიკური, ასევე სამართლებრივი მხარე. ამ თვალსაზრისით რაიმე დაბრკოლება რომ შეგვქმნოდა, პრეცედენტი არ გვაქვს. სამართლებრივი გარანტიები კანონშივეა ჩადებული“ - განაცხადა თამარ ქალდანმა.
მოსარჩელე მხარე კი ირწმუნება, რომ კონტროლის მექანიზმი შემცირებულია.
„ინსპექტორის ხელში არსებული კონტროლის მექანიზმი არის უცვლელი თუ არა გაუარესებული. კერძოდ, ადრე არსებულ ორგასაღებიან სისტემასთან შედარებით, დღეს პერსონალურ მონაცემთა დაცვის ინსპექტორი არ რთავს კონკრეტულ აბონენტს მოსმენაზე, ინსპექტორი მხოლოდ იღებს სასამართლოს განჩინებას ელექტრონულად მოსმენის დაწყებასთან დაკავშირებით და მას აქვს შესაძლებლობა, გამორთოს აბონენტი მას შემდეგ, რაც მოსმენა დაიწყო. ამიტომ მიგვაჩნია, რომ კონტროლის მექანიზmები არის გაუარესებული და კვლავ არსებობს ის საფრთხეები, რომლებიც არსებობდა ჯერ კიდევ საკონსტიტუციო სასამართლოს მიერ 2016 წლის 14 აპრილს მიღებული გადაწყვეტილების მომენტისთვის“- განაცხადა საია-ს იურისტმა გიორგი გოცირიძემ.
განმწესრიგებელი სხდომა მეორე დღეა მიმდინარეობს. გუშინ დაახლოებით 7 საათის განმავლობაში, მოსამართლეები შეკითხვებს უსვამდნენ სახელმწიფო უსაფრთხოების სამსახურის წარმომადგენელს ბექა ზეგარდელს.
განმწესრიგებელი სხდომა, სავარაუდოდ, დღეს მხარეთა დასკვნითი სიტყვებით დასრულდება.