საკონსტიტუციო სასამართლოში მოსმენების კანონთან დაკავშირებულ სარჩელებზე განმწესრიგებელი სხდომა რამდენიმე წუთის წინ განახლდა. საკონსტიტუციო სასამართლოს პლენუმს დღეს დაგაგმილი აქვს მოწმის სტატუსით შეკითხვები პერსონალურ მონაცემთა დაცვის ინსპექტორს და სახელმწიფო უსაფრთხოების სამსახურის წარმომადგენელს დაუსვას, თუმცა ამ დრომდე სასამართლო დარბაზში თამარ ქალდანი არ გამოჩენილა. დღევანდელი განმწესრიგებელი სხდომა, რომელიც საკონსტიტუციო სასამართლოს არსებობის ისტორიაში ყველაზე ხანგრძლივი აღმოჩნდა, ხვალაც გაგრძელდება.
უმრავლეს შემთხვევაში ანალოგიური სხდომები , რომელზეც სარჩელის წარმოებაში მიღების საკითხზე მსჯელობენ, ერთდღიანია. მოსმენების კანონთან დაკავშირებით სხდომა 20 ივნისს დაიწყო, სამ დღეს გაგრძელდა და დღეს ისევ განახლდა.
პარლამენტის მიერ მიღებული ახალი კანონი სახალხო დამცველთან ერთად 326-მა მოქალაქემ გაასაჩივრა. მოსარჩელე მხარე მიიჩნევს, რომ პარლამენტმა უგულებელყო საკონსტიტუციო სასამართლოს ერთი წლის წინანდელი გადაწყვეტილება, რომლითაც ანტიკონსტიტუციურად გამოცხადდა ის ნორმა, რომლითაც ე.წ. მოსმენების გასაღებს სახელმწიფო უსაფრთხოების სამსახური ფლობდა.
სარჩელების ავტორები აცხადებენ, რომ კანონი ამის შემდეგ მხოლოდ ფორმალურად შეიცვალა, შინაარსობრივად კი იგივე დარჩა. საწინააღმდეგო მოსაზრება აქვს მოპასუხე მხარეს.