თბილისში ხშირი მგზავრობის გამო, ოკუპირებული ახალგორის მოსახლეობას ოკუპანტები სამსახურიდან გათავისუფლებით ემუქრებიან.
დე ფაქტო ადგილობრივი მთავრობა ახალგორელებს მოუწოდებს, გააკეთონ ე.წ. არჩევანი საცხოვრებელ ადგილთან დაკავშირებით. ინფორმაციას ამის შესახებ საინფორმაციო პორტალი ეხო კავკაზა ავრცელებს.
ჟურნალისტი მურატ გუკემუხოვი წერს, რომ დაახლოებით ერთი თვის წინ, 9 ივნისს, ოკუპირებული რეგიონის დე ფაქტო პრეზიდენტი, ახალგორში ფილიპ ხაჩიროვის ახალ ე.წ. ხელმძღვანელად წარდგენის დროს, მოსახლეობას მოსალოდნელი ცვლილებების შესახებაც ესაუბრა. მისი განცხადებით, ახალგორელებს, რომლებიც წეროვანში, დევნილთა დასახლებაში ცხოვრობენ და ოკუპირებულ რეგიონში მუშაობენ, მოუწევდათ დაფიქრება არჩევანზე: ან საცხოვრებლად ოკუპირებულ რეგიონში დაბრუნება ან სამუშაო ადგილის პოვნა რეგიონის ფარგლებს გარეთ, ქართველი სამართალდამცველების მიერ კონტროლირებად ტერიტორიაზე.
ეს ე.წ. რეგულაციები ძალაში რეალურად არ შესულა. წეროვანში მცხოვრებლები ოკუპირებულ ახალგორში შეზღუდვის გარეშე მგზავრობენ, ახალგორელები თბილისში.
ადგილობრივი მოსახლეობის ნაწილი ამ ინფორმაციას არ გასცნობია. ნაწილი კომენტარისგან თავს იკავებს. რას აცხადებს ოფიციალური თბილისი საოკუპაციო რეჟიმის ულტიმატუმზე, 8 საათზე მოამბეში ქეთი ბერაიას რეპორტაჟში ნახავთ.