საქართველო პარიზის კლიმატის შეთანხმებას შეუერთდა. შეთანხმების დოკუმენტის რატიფიცირების შედეგად, საქართველომ საკუთარ თავზე აიღო ვალდებულება, რომ დოკუმენტზე ხელმომწერ 200 ქვეყანასთან ერთად, კლიმატის ცვლილების წინააღმდეგ იბრძოლებს. რატიფიცირება 2017 წლის 7 ივნისს მოხდა. აღნიშნული საკითხი ევროპის კლიმატის დიპლომატიის კვირეულზე განიხილება, რომელიც ევროკავშირის ელჩმა საქართველოში იანოშ ჰერმანმა და გარემოს დაცვის მინისტრის მოადგილემ ეკა გრიგალავამ გახსნეს. იანოშ ჰერმანმა კლიმატის ცვლილების წინააღმდეგ ბრძოლის მნიშვნელობაზე ისაუბრა და ამ კუთხით, ხაზი გაუსვა პარიზის შეთანხმებას, სადაც 20 წლიანი სამოქმედო გეგმაა გაწერილი. ევროკავშირის ელჩის თქმით, ეს პრობლემა საერთოა და ამიტომ, ერთობლივი ძალისხმევაა საჭირო იმისთვის, რომ დასახული მიზნის პროგრამა მინიმუმი მაინც შესრულდეს. გეგმის მიხედვით, პარიზის შეთანხმებაზე ხელმომწერ ქვეყნებს ეკისრებათ ვალდებულება, რომ მინიმუმ 2 გრადუსით შემცირდეს ტემპერატურის ზრდა. დოკუმენტის რატიფიცირებით, საქართველოსაც დაეკისრა ვალდებულება, ქვეყანამ 2030 წლამდე 25%-ით შეამციროს სათბური გაზების რაოდეობა. ევროკავშირის ელჩი საქართველოს საერთო მიზნების მისაღწევად ღირებულ პარტნიორს უწოდებს. მისივე თქმით, ამ კუთხით აქტიური თანამშრომლობაა დაგეგმილი. ევროკავშირის კლიმატის დიპლომატიის კვირეულის ფარგლებში, მსგავსი შეხვედრების გამართვა მომავალშიც იგეგმება.