აზერბაიჯანელი ჟურნალისტის აფაგნ მუხტარლის საქმე შინაგან საქმეთა სამინისტროს ნაცვლად, პროკურატურამ უნდა გამოიძიოს,- ეს განცხადება სახალხო დამცველმა გააკეთა.
უჩა ნანუაშვილის განმარტებით, კითხვის ნიშნები ძალიან ბევრია, თუნდაც ის, რომ დღემდე გამოძიებას ისევ შსს აგრძელებს.
„ეს მე ვფიქრობ ამ საქმესთან დაკავშირებით სერიოზული პრობლემაა. აზერბაიჯანელი ჟურნალისტის საქმეში ხარვეზები უკვე სახეზეა. აქედან გამომდინარე, საქმე სხვა სტრუქტურამ უნდა გამოიძიოს. ამ შემთხვევაში პროკურატურამ, რადგან იყო განცხადებები იმასთან დაკავშირებით, რომ ამ საქმეში სწორედ შინაგან საქმეთა სამინისტროს თანამშრომლები იყვნენ ჩართულნი. აუცილებელია, საგამოძიებო მოქმედებები უფრო დამოუკიდებელმა უწყებამ ჩაატაროს“,- განაცხადა ნანუაშვილმა.
მისივე თქმით, სახალხო დამცველი გამოძიებასთან დაკავშირებით გარკვეულ დეტალებს ითხოვს. როგორც ნანუაშვილმა აღნიშნა, ისინი თვალყურს ადევნებენ საქმის გამოძიების პროცესს.