ბათუმის 11-12 მარტის მოვლენების საქმეზე დაკავებული ირაკლი ჩხვირკია მეექვსე დღეა შიმშილობს, - ამის შესახებ მისმა ადვოკატმა, გოგა ონიანმა განაცხადა.

მისი თქმით, შიმშილობა პატიმრობაში მყოფმა ჩხვირკიამ პროტესტისა და ციხეში არსებული მძიმე მდგომარეობის გამო დაიწყო.

როგორც ონიანმა განაცხადა, ირაკლი ჩხვირკიასთან საკანში ოთხი პატიმრის ნაცვლად, ექვსი პატიმარი იმყოფება. ერთ-ერთი მათგანი კი, „ნაციონალური მოძრაობის“ წევრობის გამო, ჩხვირკიას შეურაცხყოფას აყენებს.

„ციხეში მას ძალიან მძიმე პირობები აქვს. ოთხკაციან საკანში ექვსი ადამიანი იმყოფება, ფაქტობრივად, გაუსაძლისი მდგომარეობაა. ისინი საკანში ვერ ეტევიან. ერთ საწოლზე ორი ადამიანი წვება. საკანში ჩხვირკიას პოლიტიკური ნიშნით „ნაციონალური მოძრაობის“ წარომადგენლობის გამო შეურაცხყოფაც მიაყენეს. ეს ყველაფერი საფუძველი გახდა იმისა, რომ ირაკლი ჩხვირკიას შიმშილობა დაეწყო. სიმართლის დასამტკიცებლად სხვა გზა ვერ ნახა“, - განაცხადა გოგა ონიანმა.

ონიანის თქმით, ირაკლი ჩხვირკიას ჯანმრთელობის შესახებ ინფორმაციას არ ფლობს.