არასაარჩევნო პერიოდში ცესკო-ში სხდომებზე დასწრებისა და გადაღების მიზნით, მედიის აკრედიტაციის წესი ცესკო-ს დადგენილებით განისაზღვრება.
საარჩევნო კოდექსში შესატანი ცვლილება, რომელიც პრესისა და მასობრივი ინფორმაციის სხვა საშუალებების წარმომადგენელებს საარჩევნო ადმინისტრაციაში მუშაობის წესებს უდგენს, დავის საგანი ხდება.
მედიის აკრედიტაციის წესის განსაზღვრასთან დაკავშირებულ ცვლილებას არასამთავრობო სექტორი აპროტესტებს.
„საია“ , „საერთაშორისო გამჭვირვალობა- საქართველო“ და „სამართლიანი არჩევნებისა და დემოკრატიის საერთაშორისო საზოგადოება“ გავრცელებულ განცხადებაში მიუთითებენ, რომ კოლეგიალური საჯარო დაწესებულების სხდომა საჯაროა და შესაძლებელია დაიხუროს მხოლოდ პერსონალური მონაცემების, სახელმწიფო ან კომერციული საიდუმლოების შემცველი ინფორმაციის განხილვის საფუძვლით.
„სრულიად გაურკვეველია, რა დამატებითი შეზღუდვები შესაძლებელია დაწესდეს ცესკოს დადგენილებით კოლეგიური საჯარო დაწესებულების სხდომაზე დასწრების კუთხით. განსაკუთრებით, მაშინ როდესაც საქმე პრესისა და მასობრივი ინფორმაციის საშუალებებს ეხება. თუნდაც, არა საარჩევნო პერიოდში საარჩევნო კომისიების საქმიანობის გამჭვირვალობისა და ანგარიშვალდებულების უზრუნველყოფის მიზნით, აუცილებელია შენარჩუნდეს ზოგადი წესი, რომლის თანახმად, კოლეგიური საჯარო დაწესებულების სხდომა საჯაროა, გარდა ზოგადი ადმინისტრაციული კოდექსით დადგენილი გამონაკლისებისა“,-აღნიშნულია არასამთავრობო ორგანიზაციების განცხადებაში.
საარჩევნო კოდექსში აღნიშნული დამატების შეტანის ინიციატორი ცენტრალური საარჩევნო კომისიაა.
როგორც ცესკოს პრეს-სპიკერი ანა მიქელაძე აცხადებს, დღემდე, კანონმდებლობა მედიას მუშაობის წესებს მხოლოდ საარჩევნო პერიოდში უდგენდა და აუცილებელი იყო განსაზღვრულიყო არასაარჩევნო პერიოდში მუშაობის წესებიც.
ორგანული კანონის პროექტი „საარჩევნო კოდექსში შესატანი ცვლილებების შესახებ“, პარლამენტმა პირველი მოსმენით 16 ივნისს, 82 ხმით 1-ის წინააღმდეგ მიიღო.
კანონპროექტის თანახმად, კოდექსის 44 მუხლს მე-6 პუნქტი ემატება, რომლის თანახმადაც, არასაარჩევნო პერიოდში საარჩევნო კომისიის სხდომებზე დასწრების და კომისიის სხდომების გადაღების მიზნით, პრესისა და მასობრივი ინფორმაციის საშუალებათა აკრედიტაციის წესი ცესკოს დადგენილებით უნდა განისაზღვროს.