თბილისში, ძალისმიერ სამჭიდში მიმდინარე მსოფლიო ჩემპიონატზე მომხდარი შემთხვევის შედეგად დაჭრილი სპორტსმენის მდგომარეობა სტაბილურია. ამის შესახებ საზოგადოებრივის ჟურნალისტს დაჭრილი მამაკაცის ახლობლებმა განუცხადეს.

დაჭრილ სპორტსმენს მეხუთე საავადმყოფოში რამდენიმესაათიანი ოპერაცია ჩაუტარდა.

ექიმების განცხადებით, მამაკაცს სხეულის ზედა ნაწილში, მათ შორის ყელის არეში მრავლობითი ჭრილობები აღენიშნებოდა. პაციენტი რეანიმაციულ განყოფილებაში რჩება.

გურამიშვილის გამზირზე, „აღმოსავლეთ ევროპის უნივერსიტეტში“ ძალისმიერ სამჭიდში მიმდინარე მსოფლიო ჩემპიონატზე ოთხი პირი დაჭრეს.

შინაგან საქმეთა სამინისტროს ცნობით, მომხდარზე გამოძიება სისხლის სამართლის კოდექსის 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.