მკვლელობა თბილისის ცენტრში. 27 წლის მამაკაცს გვიან ღამით, ვაჟა-ფშაველას გამზირზე ესროლეს. დაჭრილი სასწრაფო სამედიცინო დახმარების ბრიგადამ რესპუბლიკურ საავადმყოფოში გადაიყვანა, თუმცა მისი გადარჩენა ვერ მოხერხდა.

თვითმხილველების თქმით, მათ 10-მდე გასროლის ხმა გაიგეს. გავრცელებული ინფორმაციით, ერთ-ერთ ეზოში ჩხუბი მოხდა, რასაც რამდენიმე გასროლა მოჰყვა. ამის შემდეგ კიდევ რამდენიმე გასროლა უკვე სათამაშო მოედანზე გაისმა.

გარდაცვლილი 2009 წელს პირის დაჭრისთვის იყო ნასამართლევი. გავრცელებული, დაუდასტურებელი ინფორმაციით, მკვლელობა შურისძიების მოტივით მოხდა.

ფაქტთან დაკავშირებით, გამოძიება შინაგან საქმეთა სამინისტრომ სისხლის სამართლის კოდექსის 108-ე და 236-ე მუხლებით დაიწყო, რაც განზრახ მკვლელობასა და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.