თბილისის საქალაქო სასამართლოში ჟურნალისტ ელისო კილაძის შვილის დავით ხარშილაძის პროცესი გაიმართა.
სხდომაზე ბრალდების მხარის რამდენიმე მოწმე დაიკითხა, მათ შორის პოლიციელები, ვინც დავით ხარშილაძის ჩხრეკაში და ნარკოტიკული საშუალების ამოღებაში მონაწილეობდნენ. სასამართლოს ჩვენება მისცა პოლიციელმა ზაქარია ვასაძემ, რომელმაც ჩხრეკის დეტალებზე ისაუბრა.
ელისო კილაძის განცხადებით, დაცვის მხარემ სასამართლოს თხოვნით მიმართა, რომ მოხდეს იმის დადგენა, თუ სად იყო ხარშილაძის დაკავებისას პროკურორი მესტვირიშვილი, რადგან კილაძის თქმით, მოწმეები ამბობენ, რომ საქმეში გამომძიებლები სწორედ მესტვირიშვილმა ჩართო.
ქრონიკა პლუსის რედაქტორის თქმით, მისი შვილის სასჯელი უკვე დაწერილია და ამის შესახებ ის განცხადებას ოთხშაბათს სპეციალურ ბრიფინგზე გააკეთებს.