გურამ რჩეულიშვილის მიერ შეთავაზებული დაზარალებულთა დაკმაყოფილების გეგმა პროკურატურისთვის ამ ეტაპზე დამაკმაყოფილებელი არ არის და შესაბამისად, მისი განხილვა ამ ეტაპზე არ მოხდება, - ამის შესახებ ჟურნალისტებს „ცენტრ-პოინტის“ საქმის პროკურორმა დავით გუმბერიძემ განუცხადა.
"ბრალდების მხარე არანაირ გეგმას და სამოქმედო სტრატეგიას არ განიხილავს საპროცესო შეთანხმებასთან დაკავშირებით. ჩვენს მიერ შეთავაზებულია პირობა, რომ დაკმაყოფილდნენ დაზარალებულები. როდესაც ჩვენ გვექნება რეალურ,ი წინ გადადგმული ნაბიჯი და დაკმაყოფილდებიან დაზარალებულები, ამის შემდგომ ვიმსჯელებთ საპროცესო შეთანხმებაზე. მათ მიერ შემოთავაზებულია მხოლოდ გარკვეული ინვესტორები და სამომავლო გეგმა", -აღნიშნა პროკურორმა.
როგორც გუმბერიძე აცხადებს, ვიდრე არ გადაიდგმება კონკრეტული ნაბიჯები დაზარალებულთა დასაკმაყოფილებლად, მსჯავრდებულ მაია რჩეულიშვილთან და რუსუდან კერვალიშვილთან საპროცესო შეთანხმება არ გაფორმდება.