გარემოსა და ბუნებრივი რესურსების დაცვის სამინისტრო პერიოდულად ამზადებს საქართველოს გარემოს დაცვის მოქმედებათა ხუთწლიან ეროვნულ პროგრამას (NEAP), რომელიც ასევე წარმოადგენს ქვეყნის გარემოს დაცვის საშუალოვადიან სამოქმედო გეგმას. საქართველოს გარემოსა და ბუნებრივი რესურსების დაცვის სამინისტრომ, ევროკავშირის ფინანსური დახმარებით, შეიმუშავა საქართველოს „გარემოს დაცვის მოქმედებათა მესამე ეროვნული პროგრამის“ (NEAP-3) სამუშაო ვერსია. დოკუმენტში მოცემულია 2017-2021 წლებში განსახორციელებელი გარემოსდაცვითი სტრატეგია და ღონისძიებები. სასტუმრო „ამბასადორში“ დოკუმენტის საჯარო განხილვა გაიმართა. შეხვედრის მონაწილეებს გარემოსა და ბუნებრივი რესურსების დაცვის მინისტრის მოადგილემ ეკატერინე გრიგალავამ და ევროკავშირის წარმომადგენელმა საქართველოში ალვარო ორტეგამ მიმართეს. შეხვედრაზე NEAP-3-ის შემუშავებაში ჩართულმა ექსპერტებმა გარემოს დაცვის კუთხით დოკუმენტში ასახული ძირითადი პრიორიტეტები და მიზნები წარმოადგინეს. დოკუმენტის განხილვაში მონაწილეობა პარლამენტის გარემოს დაცვისა და ბუნებრივი რესურსების კომიტეტის თავმჯდომარემ კახაბერ კუჭავამ, სხვადასხვა სახელმწიფო უწყებების, არასამთავრობო ორგანიზაციების, მუნიციპალიტეტებისა და კერძო ბიზნესის წარმომადგენლებმა მიიღეს.